陳淑蘭抱歉摑情敵舊史出土：方中信心胸好廣闊 為男人反面20年感激陳淽菁冇嬲佢丨獨家
發佈時間：07:00 2024-06-04
同樣54歲的陳淑蘭和陳淽菁因誤會超過20年冇聯絡，早前破冰更首度合作主持港台節目《她•他•它》，探討如何面對生活難題。兩人表示重拾友誼會更加珍惜，又公開對愛情睇法和保持青春的秘訣。對於早前接受網台訪問，令陳年掌摑情敵莫可欣事件翻hit，蘭子就覺得非常抱歉，更大讚舊愛方中信夫婦心胸廣闊，「多謝包容我」。採訪：杜杜 攝影：Stanley
蘭子和淽菁認為目前才是合作好時機，蘭子笑言：「相信九運真係旺中女嘅，太早合作，智慧未去到。」她又解釋由《開心日報》朝早10點轉到《她•他•它》夜晚10點，全因社會有好多負面情緒，她認為要陪伴聽眾分享心事，「正如媽咪當年有腦退化，我有姐姐（家傭），唔使24小時畀晒媽咪，但依然覺得好辛苦，知道有同行者互相交流，會覺得好有力量，希望可以幫人打氣。」
互稱「陳總」「陳秘書」
淽菁笑言兩人合作未夠1個月，已確立蘭子為「陳總」，她是「陳秘書」的關係，蘭子自爆：「黎瑞恩問我，你同淽菁做嘢佢會唔會嬲你？我話嬲咩呀？佢話你咁懶唔做嘢，我話淽菁話畀我聽，佢最鍾意做嘢，咁就一拍即合。」蘭子坦言乜都靠晒「陳秘書」，「淽菁話有啲資料搜集，我話你唔使話畀我知，我係你個影，我跟住你行得㗎嘞！」兩人超過20年沒聯絡，不過蘭子跟淽菁身邊人反而有接觸，「佢老公係一流律師，喺佢口中知佢老婆好大方冇嬲過我。」蘭子怪自己誤信小人讒言，在飯局中主動跟淽菁道歉冰釋誤會「我比較天真爛漫，到𠵱家都係老天真。」講到當日為男人而產生誤會，淽菁說，「我老公係佢介紹，佢都誤會，我唔鍾意解釋，知佢受人影響。都好多謝佢，我喺娛樂圈都唔係俾人蝦得少，但佢係唯一一個會錫返我嘅人，會好珍惜呢個朋友。」
努力同地心吸力搏鬥
兩女同樣1969年7月出世，雖然快將55歲，但keep得唔錯，淽菁答得搞笑：「可能我細個個樣已經好老，五官唔係特別靚，我座右銘係，唔係最靚嘅少女，但一定要做最靚嘅婆婆，堅持勤力做運動，食嘢好小心，日日做面部按摩、面膜，刮痧，仲有唔同嘅美容家用機，努力同地心吸力搏鬥，我做到你都做到，反而蘭子就真係天生麗質。」蘭子即否認，「大家都知我做醫學美容出過事，呃唔到人有證有據。」蘭子大方承認有keep住打美容針，並笑言：「都係為咗節目，我不入地獄誰入地獄？！」她又認為心情開朗是保持年青最好方法。
跟大律師丈夫張錦榮結婚21年，女兒珈瑋（Antonia）亦已20歲，在加拿大修讀生命科學，淽菁好珍惜老公，「感情好難一路保鮮，要提醒自己初心，除咗係我先生，亦係我好親嘅親人，一定要諗啲活動大家一齊做，咁會行得再耐啲。」而她跟女兒關係如好朋友，「否則好多嘢唔會同你講。」 她透露女兒第1次見蘭子已經話：「I like her，覺得佢好開心。」冇仔女的蘭子讚Antonia好乖，好想上契。
蘭子擇偶唔要小鮮肉
蘭子笑言會積極搵多啲契仔契女，「等時老咗，等佢哋推我出去曬太陽。」問到是否已放棄拍拖？淽菁即爆她多人追，蘭子玩搞笑：「可以騙我色，但唔可以騙我財，哈哈！」談到擇偶條件，「相處舒服囉！我唔鍾意小鮮肉，最多細1、2年，我注重內涵。」蘭子認真表示很享受單身，最重要有好多愛錫她的朋友，「好多人同我講，好可惜喎你單身，望吓我生活先，我驚你妒忌，𠵱家過時過節，一早有5家人約我年夜飯，假設我搵到老公，分分鐘遇到問題，老公唔幫我處理，𠵱家有事唔使開聲，大家已經幫我處理，好多人照顧同關心我。」
至於早前接受網台訪問，令當年掌摑莫可欣事件翻hit，蘭子即解釋：「我想搞氣氛係講笑，未必係講緊嗰件事，第1次上呢啲直播節目，留言有佢（莫可欣）個名，我由頭到尾冇講過任何人嘅名，有聽節目嘅人就知。我唔想傷害人，莫小姐係好大方嘅人，有次首映，我同佢打招呼，佢都好好，我哋冇嘢㗎！」她承認後生時處事衝動，「我衝動嘅傷害性幾大，莫小姐、方先生（方中信）都好包容我，好彩遇到心胸廣闊嘅人，佢哋知我唔係有心。」
《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》新網站有更多精彩內容：http://www.stheadline.com/
