朱咪咪見盡發姣女藝人爭上位 入行半世紀慶幸冇男人緣勸同行帶眼識人丨獨家
發佈時間：07:00 2024-10-12
本月26日朱咪咪將「登七」，雖自稱又奀又唔識交際嘅藝員仔，但能撈到今時今日擁有香港、星馬10個物業，過億身家，超勁。她最自豪25歲時冇知名度，膽粗粗隻身來港唱酒廊，更賺到第一桶金及識到老公馬坤。入行多年，咪咪姐見盡圈中光怪陸離事，妹妹仔嗲聲嗲氣勾搭人夫時有發生，「食過夜粥」的她坦言：「見得太多喇…」採訪：方騫平
近年朱咪咪長居新加坡享兒媳福，之前她返港，為深水埗一間老字號金行的酒樓晚宴唱足兩晚，咪咪姐以港姐音樂伴隨出場，叉住腰的她邊行邊搞笑地說：「朱咪咪芳齡18，三圍38、22、68，坐得好穩…」之後在台上唱《飛躍舞台》、《千個太陽》、《禪院鐘聲》等，邊唱邊跟觀眾互動，大搞氣氛，HIGH爆全場。
瘋狂接JOB暴瘦10多磅
迎來70歲的咪咪姐依然大把世界，近月忙到冇停手，做完酒樓Show後再到澳門及美國演出，另外又去佛山跟洪金寶拍電影《功夫少年》，對於被指暴瘦現「樹根頸」，她中氣十足解畫：「成個月忙住做嘢，係瘦咗10幾磅，咁跑法蛇到死啦，但我精神、精力好好，夜晚唔食澱粉質係好好嘅，我呢個年紀瘦啲好過癡肥，更何況體重Keep住110多磅，『樹根頸』係影相角度問題，相中我個頭側側哋，條頸點會冇事呀？」
擺款新人出入成堆助手
咪咪姐唔識Social，人脈唔算多，但工作認真，所以有好多翻頭客，故不時買埋禮物到老人院義演：「台上做嘢我絕唔馬虎，台下有目共睹嘅，所以多年嚟觀眾都咁支持我。個天錫我，我錫老人家，𠵱家狀態經已心滿意足。」咪咪姐坦言只係一個藝員仔，冇資格擺款，單人匹馬去美國登台，唔使要求住幾千呎酒店總統套房，更笑言，「我怕黑㗎。」講到排場問題，入行幾十年的咪咪即變咪咪姐爆秘密：「大把後生藝人擺款啦，出入要有『皇朝馬漢張龍趙虎』，呢班多數係簽咗經理人合約，𠵱家唔係要爭取知名度簽經理人，係要用排場嚟提升地位去接Show，咁各取所需啫，而我從來冇助手，仲可以貼錢做老人院，因為我覺得實力重要過排場。」樂得自由的咪咪姐唔介意在TVB一年只得6個騷：「一個人只要冇要求樣樣都會順啲；否則達唔到要求會好唔開心。」
冇男人緣原來行好運
另外，對於55歲鄭梓浩被前女友Grace大爆「食軟飯」7年，期間又搭上內地「小三」，及被孫耀威人妻妹妹孫美賢包養，咪咪姐說：「情騙呢啲唔分男女老幼，不過，我好好彩由後生都𠵱家都冇乜男人緣，老公以外，喺新加坡只交過1至2個男朋友，婚姻以外嘅都係桃花劫，以我副尊容冇乜人埋嚟，冇爛桃花係福氣。」咪咪姐更直言陌生人要埋身攞著數唔容易：「要記住，交友唔好有多一層關係，包括錢及性，借出去啲錢好難收返，我慳慳埋埋，辛苦工作嘅血汗錢係留畀兩個仔，老公有嘢做唔使我養。」咪咪姐見過圈中唔少為上位發姣嘅女藝人：「嘩！呢啲多的是啦，以前唱夜場見過啲『囡囡』向人夫，挨身挨勢嗲聲嗲氣發功，最後都成功搭上咗，我哋做呢行見得太多，但就算知都唔會理，我有我生活；佢哋有佢哋忙碌；事不關己己不勞心。」
