張運兒不怕單身過情人節 自製甜品慶祝一樣好快樂丨獨家
發佈時間：08:00 2025-02-11 HKT
張運兒（Yoona）最近推出創作新歌《無人陪我也很快樂》，吐露獨處也可以過得很精彩心情，就算單身過情人節亦不覺孤單，更可自製甜品慶祝，她還示範Tiramisu杯送給讀者和粉絲，不過將來也希望找到個為她下廚的另一半。採訪：杜杜 形象:Peli Lam@pelilam 髮型:Aki Choi@akichoi@The Attic Hong Kong@theattichongkong化妝:Man Man@manmanflm服裝:@athenaeum_m
本身是K-pop迷的Yoona，一直恨有配合舞蹈的作品，《無人陪》令她如願以償，「感覺好唔同，以前cover K-pop嘅歌係唔使唱，𠵱家要顧埋唱， 而且作為藝人唔係動作好睇就得，仲要做好表情管理，係難㗎！但好開心𠵱家有自己作品同屬於自己嘅舞蹈。」
一個人玩錄歌解悶
歌曲主題來自Yoona和老闆兼製作人楊鎮邦，同樣是「Ｉ」人的感受，「我哋成日覺得過時過節點解一定要一班人呢？！自己一個都可以好開心，唔一定要有人陪先得，獨處都可以自得其樂。」一個人過節，興趣多多的她也不愁寂寞，「試過有次生日，咁啱打8號風球，冇得食生日蛋糕，仲要留喺屋企過，都冇乜嘢喎！冇得出去玩咪睇吓戲、睇吓書、打吓機一樣好開心，同埋我好鍾意玩錄歌，試過用啲唱歌Apps錄鍾意嘅歌，一錄就3、4個鐘。」
就連情人節，Yoona一樣不用有任何儀式感，「如果有另一半，可能出去食餐飯慶祝，但𠵱家情人節一定要慶祝，都係為咗刺激消費啫！我唔受呢套，平時對我好，日日開心過就OK，如果淨係嗰日對我好，好似好作狀！」她就算冇人送，親自整情人節甜品一樣好開心，仲即場示範整Tiramisu杯，「我本身最鍾意抺茶口味，有人會覺得Tiramisu好膩，抺茶有啲苦澀就會冇咁膩，而且呢款比較簡單唔使焗，有雪櫃就得，初學者都OK。」不過她坦承希望搵到個為她下廚的男仔，「當然會加分，會覺得好貼心，好似睇《黑白大廚》咁，認真做事嘅男人最吸引。」
