王菀之演唱會2025丨Ivana 11年後再登紅館 邀張敬軒合體相擁而泣 劉德華親自到場支持
發佈時間：17:45 2025-02-23 HKT
王菀之（Ivana）睽違11年再登紅館，昨晚舉行紀念入行20周年的《合體–王菀之演唱會2025》。這晚特別邀請靈魂伴侶張敬軒「合體」，而劉德華、炎明熹、謝安琪、張繼聰、GinLee、白只、阿卵、梁仲恆、梁祖堯、湯駿業等好友均到場支持。
跳現代舞獲得熱烈掌聲
開場時Ivana已講明，團隊上下一心、想做一個非一般的紅館騷，她第一首歌開始全場就已經企晒起身，接着投入音樂世界當中，一口氣唱了11首作品。第二部分，Ivana又一口氣唱了11首歌，當中包括有自彈自唱，又單獨跳了一part現代舞，引爆熱烈掌聲及歡呼聲。唱了11首歌後，Ivana跟觀眾打招呼，「我唱得咁落力，其實都可以唞少少囉...」觀眾狂歡呼拍手不停，大叫「好靚呀你！」「好瘦」「好正」，Ivana飲住水突然就話，「我飲水濁親，養生咁耐竟然係飲水濁親....唔凍唔熱係容易濁親，唔係40歲以上先係咁...」可愛行為逗得觀眾狂笑不止，「多謝大家來到合體演唱會！又到咗我全晚最驚嘅環節啦....就係講嘢...」對於觀眾大叫好瘦呀，Ivana回應，「你打比我教練啦，佢辛苦過我，佢train我之後，佢瘦咗。」又引得大家笑聲不斷。
Ivana為夢想努力奮鬥
Ivana又舉起V字手勢，笑道：「其實我想V，但係咁啱又係2，20年啦！我相信係紅館開個唱嘅唱作歌手唔係好多，而女性唱作人就可能更少....」觀眾即報以熱烈掌聲及歡呼聲，「大家唔好誤會，我唔係讚自己，我唔係讚自己，我唔係讚自己....」而熱烈掌聲及歡呼聲就成分鐘就冇斷過， Ivana繼續說：「我想話，冇你地每一個支持，我又點能開到紅館演唱會呢？你哋嘅支持係令我最感動係，我代表我哋成個精英雲集嘅團隊，多謝大家。我哋成個團隊都係有夢想嘅人，為夢想努力奮鬥。」之後，她唱出成名作《我真的受傷了》。
與張敬軒演繹哭泣版《下次愛你》
至於第三部份，台面出現兩張對坐椅子，Ivana表示，「以下環節，我都唔想多講啦」然後觀眾已經瘋狂歡呼，「係好特別，呢首歌送比現場每一位，送比我自己，亦送埋比佢。」繼而靈魂伴侶張敬軒升台，兩個人都靜默狀態，觀眾無敵的歡呼大嗌成分鐘，兩人都唔敢講嘢，唔敢對視，每一個現場觀眾，由兩人的行為，都感覺到軒仔及Ivana兩人珍視對方的感情，張力之大非筆墨可以形容，《下次愛你》音樂響起，Ivana已經忍不到開始喊，軒仔跟住決堤。只有歌聲，無過往演唱會嘉賓式對話演繹，軒仔唱完即降台，為大家帶來喊住唱的合唱版《下次愛你》，令現場唔單止兩人喊，不少觀眾都被感動得熱淚盈眶。唱畢兩人互相擁抱，繼而軒仔吻了Ivana一下才離開。而2人這次合體，亦令不少歌迷聯想起佢哋坐低對望對唱，同行為藝術家教母 瑪莉娜・阿布拉莫維奇（Marina Abramovic）及舊戀人兼創作夥伴烏雷（Frank Uwe Laysiepen）喺「The Artist Is Present」嘅一幕。
Ivana自彈自唱半首《面具》
今次開騷Ivana一早講明無準備encore環節，但最後一首歌《小俠》結束後，觀眾已不停狂叫，完場後亦不肯離開，狂叫近五分鐘，最後Ivana一個人走出來，手握電話說，「多謝你地，我有少少驚，我冇預encore嘅……好多謝你哋咁熱烈同鼓勵我出返嚟， 我點解帶電話，一係你哋話我聽你想聽咩，我驚我唔記得歌詞，我成日覺得encore 要係真嘅，如果冇人嗌就唔好出嚟，所以冇預就冇準備定啦。」此刻歌迷不停狂叫歌名，最後Ivana揀了自彈自唱半首《面具》，笑言有20年沒唱，直認緊張。
