祖馬龍心水│「快樂高球」一注單W

更新時間：18:28 2025-04-12 HKT
發佈時間：18:28 2025-04-12 HKT

馬場係英雄地，騎練為咗贏馬都會扭盡六壬，尤其當隻馬分數盡盡哋，需要有利形勢配合嘅時候，陣上走位要盡量慳得就慳，若果再遇上合適步速，人馬發揮又淋漓盡致，咁就會成功交出頭馬。正如剛周三賽事，「紫荊歡呼」正值當打，加上布文發揮沿途慳盡腳程，最終僅僅以頸位取勝，過程令捧場客捏一把冷汗！

當時「紫荊歡呼」出閘遇到碰撞而被逼墮後，對面直路搵到條欄慳盡，出彎後揀出揀入之際，熟悉偷位藝術嘅布文按照一貫作風揀入面，直路初無法望空，直到最後百五米「勇敢歡欣」開始散，「凝聚美麗」則持續衝刺，結果出現虛位令「紫荊歡呼」有機會發力，終於有驚無險勝出。

今日賽事鍾意「快樂高球」，呢匹馬連續跑三場嫌短嘅一千，都係僅敗畀數匹一千路程專家。上場返千二賺步速，輸畀沿途更賺嘅「幸運星球」絕不失禮。其實呢隻馬已經連場見好，仲要仗比仗逐點進步，祖馬龍斷定佢唔係唔識贏，只係稍欠運氣而已。今仗檔佳而對手一般，偷位高手布文壓陣機會壓一，有望贏馬交代，祖馬龍打算呢場大破慳囊，單Win投注！

第四場：1快樂高球、4魅影戈飛、7可靠大師
第五場：6輝煌精英、5愛馬善、1華麗再勝

↓立即下載星島頭條App↓