獨家丨艾粒欺凌15年懶理重病開Show繼續笑 音樂人關勁松逝前控訴：兩條X街
發佈時間：07:30 2023-03-02
今年商台新聞特別多，繼余迪偉公開炮轟當奴和少爺占擅取其社交平台照擺上舞台，之後輪到梁文禮因為批評梁詠琪演唱會被暫停開咪三個月，網民同情佢之餘亦瘋狂狠插艾粒玩性別歧視及職場欺凌點解乜事都冇?一石激起千層浪，有資深獨立樂隊AMK迷，睇唔過眼艾粒行為，怒爆剛去世的AMK主音關勁松，曾出PO叫艾粒收聲勿再欺凌佢，當奴道歉後，今年2月初艾粒開Show繼續將自己快樂建築在別人痛苦身上，當時阿松更已重病在床。另外被停職的梁文禮熄電話深潛，據知其「死因」跟廣告商有關。採訪:金泰亨
本地資深音樂人關勁松於上周五(24日)與世長辭，終年53歲，據知阿松因肝病離世。消息公佈後，大量歌迷難以置信，從其FB可見每日均有相識多年的樂迷留言，字裡行間滲滿淚水，多年好友卓韻芝、有交情的黃耀明及前同事林海峰亦出Po表達不捨。
當奴道完歉繼續恥笑
今年2月9日，艾粒一連四場的《Part2 ! 王鳳女士 XYZ 銀河道士大匯演》開鑼，除了不問自取播出余迪偉浸溫泉的照片，惹來對方不滿出PO炮轟要急道歉外，原來仍恥笑當年醉酒做節目的關勁松，資深AMK迷心痛偶像重病仍被玩弄不吐不快，「當年阿松醉酒開咪做903《不設劃位》節目出事，最後被炒，之後艾粒開個環節《文化節拍》嚟惡搞《不設劃位》，玩咗十幾年，阿松舊年出PO公開鬧爆艾粒，講明唔好再拎佢嚟玩，文中話當奴有道歉，但事實開Show都繼續笑緊佢。」記者翻查資料，阿松於2008年6月28日因醉酒狀態主持節目被商台解僱，即代表艾粒玩欺凌玩足15年，另外從「關勁松的Astrology」 FB Page見到，1月27日阿松出PO表示在醫院休養中，即艾粒開《Part 2》前阿松已病重。
怒爆艾粒賺不義之財
從AMK迷提供的阿松控訴PO得知，稱當年跟已離世的亞里安做《不設劃位》講電影及音樂，有日控制員話少爺占叫阿松錄少少嘢，「錄個『係』字，我好隨和，錄了。原來佢哋開個環節扮晒講影評，然後不斷撳我個『係』字，這真是一個侮辱。」阿松好憤怒向台長反映，「然後下靶當奴打給我係咁講對唔住，你估少爺占夠膽打咩?」阿松強調當時鬧當奴，「你哋搵咁多人工，我同亞里安就出好少糧，你哋仲要踩住我哋呢啲低下階層的頭上位，搵我哋嚟玩，你哋賺緊嘅係不義之財。」對於去年艾粒開三場《歌頌生命沿途有你艾與粒激情雙星璀璨二十ICHIBAN香港之夜》Show更場場爆滿，阿松有感而發，「足見支持者是非不分，一直從他們踩人頭得到歡笑，這也是香港愈來愈反智的事情。大家盡量笑吧，這些是共業，到個天修你們時，你們和這兩條Ｘ街犯下業債，要還的。」
AMK迷有去睇艾粒《Part2 ! 》的第一場，聽到艾粒仲玩緊《不設劃位》覺得無聊及憤怒，「其實現場反應麻麻，節目都冇咗咁多年，仲玩?咁冇貨咩?」
揭梁文禮被停職真相
另外，梁文禮因為在私人IG太敢言批評梁詠琪演唱會「個flow差，歌編得差，舞差」，更被翻舊帳曾對MIRROR明讚暗踩。本周一被商台暫停主持職務3個月。大懲罰引起熱議，有人撐梁文禮講真話無罪，亦有指商台處事不公，罪行更大的艾粒只道歉了事。資深公關爆料，稱梁文禮得罪廣告商。「商台收錢做演唱會指定電台，搵鏡仔做show又係收贊助大筆錢，而家唔係言論自由問題，係梁文禮講嘢得罪客人，會影響電台收入。」記者嘗試聯絡梁文禮未獲回覆，據知圈中老友聯絡佢都冇反應「邊個call都唔覆。」
【延伸閱讀】：
梁文禮貼惡評停職三個月網民唔收貨 質疑商台放生高層艾粒捲職場欺凌大細超
艾粒發文回應余迪偉性取向歧視指控 當奴會更改餘下場次節目內容
余迪偉IG怒轟艾粒歧視性取向 半祼相被玩多年擺上台兼夾職場欺凌
資深音樂人AMK成員關勁松逝世享年53歲 與不設劃位拍檔亞里安同月同日離開人世
《星島頭條》新網站有更多精彩內容：http://www.stheadline.com/
