東張西望丨老父離世現三份遺囑爆爭產 大哥疑私吞千萬現金：長兄為父！
發佈時間：22:40 2023-06-20
TVB節目《東張西望》今日（20日）報道一宗爭產案，98歲的黃爸爸於去年12月病逝，留下一幢自住丁屋、一幢出租丁屋，以及約一千多萬的現金，不過在黃爸爸離世後出現三份不同遺囑，成為爭產導火線。黃爸爸共有四女兩子，長女已經離世，還有大哥、排行最細的細佬，中間有三姊妹，接受採訪的則是細佬太太「黃太」，她代表四姊弟直接大哥罔顧弟妹利益，意圖侵佔亡父所有遺產。
【相關閱讀】：東張西望丨鳳德邨獨居婆婆狂篤鄰居鐵閘吐口水 投訴反被要求忍讓認知障礙患者
【點擊睇西貢黃家爭產】：
黃爸爸第一份遺囑於2005年所立，所有遺產由大哥繼承；而第二份則是由黃太委託律師查冊出現，遺囑於2008年簽訂，遺產承辦人為大哥及細佬。第三份最新的遺囑，則於2018年簽訂，據說是黃爸爸為外孫買樓而特別訂立，不過因律師指當中出現多項錯誤，所以已經無效。
疑有人收起均分遺囑正本
黃太說：「我哋叫黃律師查冊，查吓香港有冇其他律師樓有阿爸嘅遺囑，只係出現黃律師手上的遺囑（即2008年簽訂的第二份遺囑），但係呢份遺囑冇正本。反而大哥拎住一份早過呢份嘅遺囑，問黃律師可唔可以承認呢份遺囑。」黃太質疑有人收起第二份遺囑正本：「啲房有人鎖咗，包括阿爸嘅房，根本入唔到。我哋都有懷疑過第二份遺囑正本會唔會係佢收埋，因為只有第一份嘅話，所有嘢都變咗係佢。」
黃太表示：「以前嗰份（遺囑）得阿哥個名，或者做成錯覺以為所有嘢都係佢。」黃太透露因為遺囑問題，現在所做的是「無遺囑承辦」，將遺囑平均分配給五兄弟姊妹：「有晒簽名，大哥都簽咗，我哋嗰陣聽到都覺得好同意。」不過月初律師卻表示因大哥要求，而要終止承辦，黃太引述律師意見：「如果遺囑冇正本就用以前嗰份，或者將三份拎去法院等批。」
老父發現戶口冇錢大受打擊
大哥本來已經移民英國，但兩年前突然回流，指要照顧爸爸，黃太更直指大哥涉嫌轉走黃爸爸一千多萬的現金：「阿哥偷偷哋轉走晒阿爸千幾萬現金，起初我哋個個都唔知，自從阿爸去銀行想拎100萬畀家姐，先發現千幾萬現金冇晒，嗰時銀行經理話畀我哋聽，係大哥轉走所有錢。我哋事後都有問阿哥，點解唔等阿爸慢慢分錢，但佢嗰時已經話：『容乜易分晒畀啲女㗎？』」黃太更指黃爸爸發現自己戶口一毫子也沒有，精神大受打擊，健康情況亦愈來愈差。黃太提供的片段更見到黃爸爸在低聲悲鳴：「唉……死喇……」
除被指轉走父親一千多萬現金，原本黃爸爸是希望將丁屋租金用來支付幾兄弟姊妹的生活開支，但黃太指控大哥將出租丁屋的租金據為己有。原來雖然屋契是寫大哥名字，但他卻一毫子都沒有付出過，從黃太提供的錄音聽到黃爸爸說：「我同佢（大哥）晚晚都頂頸啊！講起笑死，佢話間屋係佢，值二千幾萬。你有冇攞過錢出嚟？斗零都冇攞過。」黃太透露丁屋租戶原本是交現金或支票，但在父親離世後，大哥卻要求租戶將租金存入其私人賬戶。
黃太與丈夫現時仍與大哥及大嫂住在同一屋簷下，而大哥獨佔2樓三間房間及一個廁所，更貼告示寫明「私人房間，閒人勿進。」《東張》團隊跟黃太進入屋內，黃太更明言是細佬出錢興建。隨後主持與黃太一同敲大哥房門，不過他表示已交律師處理，不方便回應，其後着主持到地下再傾。然而大嫂此時卻鬧爆《東張》團隊：「點啊？你有乜質格上嚟？邊個叫你哋嚟？」還直說：「冇嘢回應！」
「老竇唔喺度，係咪我話事？」
大哥落到地下亦火氣十足：「我係阿哥，明唔明白？如果我老竇唔喺度，係咪我話事先？長兄為父！」主持問到為何家事要鬧上法庭，大哥反駁謂：「唔係我事，係佢哋搵律師先，唔關我事。」至於是否有難言之癮，大哥則說：「咁我又唔方便交代。」雖然大哥叫《東張》團隊留下相關問題再作回應，不過大哥卻一直未有答覆。
《東張》找來陸偉雄大律師查看三份遺囑，陸大狀直指最新的遺囑只就一個物業作安排，並無提及其他資產，更有多項錯誤。至於2008年的遺囑所有內容皆符合法律規定，不過若有人挑戰2008年遺囑成功，將會視為無效，法庭會再睇2005年的遺囑。不過由於2008年遺囑只有副本，會被質疑其真偽，情況並不理想；陸大狀建議黃家交由法庭定斷。至於大哥所轉走的現金及租金，陸大狀亦表示：「佢應該攞返出嚟。」
【相關閱讀】：
東張西望丨奶茶店負責人被指控非禮 疑屢摸女店員臀部大腿仲撞胸
東張西望丨東張女神梁敏巧小背心又出動 網民錯重點擔心受訪者：另類測試？
東張西望丨區永權以苦主身份報《東張》 採訪時再現高空擲物：入少少，我真係驚
東張西望丨「女牧師」登報搵客一開口收500元 9秒Hea爆祈禱簡易受洗極兒戲
《星島申訴王》100集誕生之我最喜愛影片票選，由6月16日至6月30日，玩遊戲贏取總值超過10萬豐富禮品！
立刻點擊投票👉🏻https://tinyurl.com/38dfzwtv
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
