獨家丨48歲姚安娜笑談負評：能變老唔係必然 一碟歌手參加《中年2》被踩發福走樣
發佈時間：07:00 2023-07-26
26年前，擁有一把如王菲的聲線，以藝名姚琇齡推出專輯的姚安娜(Anna)，最近以電影《小丑》造型出戰《中年好聲音2》海選，被網民取笑發福兼走樣，又唔抵得她住九肚山，鬧爆她咁富貴仲出嚟唱。作為身心靈導師的她笑對負評，「刺激到佢哋咁肉緊我，都幾好呀！」她認同在香港生活壓力大，但人生就要不停挑戰苦難，更奉勸大家，「做人唔好咁執着，活著就會有價值，否則無力感只會逼死自己。」採訪：方騫平 場地：將軍澳Fleur
姚安娜於22歲出過專輯，歌手命只有9個月，做完一碟歌手後轉做「神婆」，在塔羅牌占卜及通靈界殺出血路，近年開小店賣手作沐浴產品。48歲的靚媽以一身幸福肥出戰《中年2》，海選時穿上紅色小丑裝戰衣，壓低把聲跳唱張國榮的《戀愛交叉》，她選擇用小丑嘅黑色幽默來娛樂大家，表達一念天堂一念地獄。
曾志偉睇到皺眉
姚安娜表演項目好有意思，但網民就唔受落，難得她面對大量負評仍然保持正能量：「香港人嘅水平都好接近，踩嘅嘢都一樣，離不開『咁肥仲出嚟唱？』、『肥咗好多喎，以前好樣啲』、『個頭想點？着到古靈精怪』、『唔識字呀！將曇花一現講成雲花一現』甚至話『住九肚山豪宅仲出嚟唱歌？』更有趣係惹嚟陰謀論，認為着成咁係計策。」不過網民並非一面倒負評，姚安娜以慈悲形容正評，「話『既然盡咗力就畀佢入圍啦』、『都想睇啲正面嘢』真係愈睇愈開心，原來佢哋好關心及在乎我，刺激到佢哋咁肉緊我，都幾好呀！」姚安娜覺得呢個世代好多人抑鬱，所以做啲正面嘢嚟娛樂大家。不過，她笑言曾志偉在現場睇到皺晒眉，「從眼神、身體語言表達『咩事呀？』伍仲衡評我跳舞生硬，好彩肥媽鼓勵我。雖然唱得3分鐘就被叮走，希望娛樂性搶分。哈...如果入到100強就證明TVB接受尺度闊咗，唔一定只係畀靚仔靚女唱歌。」
幾十歲冇明星夢
姚安娜承認海選準備不足，發揮得唔好：「唔知海選有直播，所以隨意揀咗套萬聖節小丑西裝，喺現場見到人生百態，有參賽者喺後台爆喊，緊張氣氛嚇到我想調頭走，但唔能夠喺囡囡面前做老鼠退縮。」仍然熱愛唱歌的Anna強調幾十歲唔再發明星夢，因為隨老公郭智明由台中回流返港，悶悶哋報名玩吓：「入到嘅咪當個天畀機會我平反囉，當年因為經理人同唱片公司搶人爭鬥被雪，做唔夠一年歌手，老公(當時男友)睇到心噏，覺得唔應該嘥咗我，想我有更多人欣賞，所以再有機會表演，會好好珍惜Show靚聲。」樂天的Anna笑言，輸咗都唔會借酒消愁，「我個人好簡單，最重要大家健在及開開心心，能夠變老唔係必然。」
嘆港人壓力太大
曾居住台中及澳門的Anna覺得香港百物騰貴，加上3年疫情及大環境氛圍令到香港人壓力好大。她認為人生係要不停挑戰苦難，向前行盡量正面面對，活著就會有價值，並奉勸做人唔好咁執著：「我哋能力有限，只能過好今日，保持今日嘅樂觀去迎接機遇，否則無力感只會逼死自己。」她強調自己絕不有錢，都會有經濟壓力，只不過疫情回流又要適應新環境，才花上6萬港元，月租九肚山低密度新樓盤來抗疫，落腳一年，短期內會搬往將軍澳細單位，未來會遷移廣州南沙區發展。
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
