陳志雲評論鄭中基與經理人風波！傳何慶湘一做法令余思敏不滿 聲明被質疑有古怪？
發佈時間：18:00 2024-08-06
鄭中基（Ronald）日前突然於FB宣布因發現經理人何慶湘「工作及道德操守有問題」，決定與「機動娛樂」立即終止合作，其後鄭中基更指自己因情緒健康問題將會暫時休息，隨即惹來不少揣測，今日（6日）鄭中基再發聲明坦言患上抑鬱症並「選擇咗飲酒去逃避現實」，透露有酗酒問題。陳志雲昨日（5日）在「志雲頻道stephenchannel」的「陳李聯FUN」上討論鄭中基事件並坦言「曾經聽聞一個版本」。
相關閱讀：鄭中基與女經理人風波惹揣測！稱與余思敏組織家庭好幸福 認患抑鬱症要停工
陳志雲李婉華討論鄭中基事件：
李婉華與陳志雲討論鄭中基事件
在節目上，李婉華坦言想與陳志雲討論這個問題，李婉華說：「我個人覺得呢件事唔係咁簡單，唔係為咗錢事，逢係呢啲即刻要中止合作，就話對方有啲不道德嘅事發生咗，我諗佢哋相識都好耐，唔係話呢幾年間咁短，可能係一段長時間嘅合作。」陳志雲聞言後表示：「佢哋係識咗一段好長時間，嗰陣鄭中基離開黃栢高（Paco）之後，佢就已經同何慶湘合作，搵咗佢過嚟幫手，後來覺得佢幾好，就搵埋佢做經理人，講緊係超過10年，甚至係更長嘅合作關係。」
李婉華還說：「鄭中基話要離開呢個公司，咁間公司佢有份定冇份？佢冇份就話離開，咁如果佢有份就唔係離開啦？我睇番啲資料，喺2020年呢個機動電視台開台嘅時候，鄭中基係拎咗過百萬落去。」陳志雲指有跟鄭中基關係密切的人透露：「話今次佢只係寫嘅時候文字表達唔準確，佢唔係終止同機動電視嘅合作，係終止同何慶湘合作，呢度仍然都係佢嘅，佢係會繼續。」而昨日鄭中基在聲明上亦提到：「本公司旗下YouTube channel「機動電視台RTV」，將進行節目調動安排，在未來仍會如常運作。本公司旗下品牌「大佬好嘢」，存貨已全部售罄，網店如有新貨品將立即通知大家，未來運作亦一切如常。」
李婉華認為何慶湘身份「過咗界」
李婉華亦坦言：「自從4年前電視台一開，何慶湘嘅角色就好重要，如果佢係幕後嘅經理人，一直喺幕後做一啲嘢去支持呢位老闆，但係我發現呢位何慶湘就唔係，佢一直努力參與幕前工作，甚至永遠都會喺鄭中基嘅側邊，如果喺經理人或者助手嘅角色，我覺得係出咗位好多，過咗界。」陳志雲稱自己沒有內情，雖然身邊人都有這個說法，但他只是估計：「因為佢哋嘅工作關係好密切，有時候喺呢啲環境，個老闆好叻，對老闆有啲仰慕一啲都唔出奇，但係我唔係話何慶湘一定係咁。」李婉華亦有解釋自己為何這麼「上心」，因她去年看到余思敏借語錄放負，直到鄭中基日前出Post前，余思敏高姿態地出po令人惹來不少遐想。
陳志雲稱與鄭中基和余思敏並不熟
陳志雲又稱與鄭中基和余思敏並不熟悉，但曾經聽聞一個版本：「而家係有兩邊，一邊係覺得何慶湘係有唔妥，另一邊稱要為何慶湘『平反』，事緣鄭中基做幕前，佢搞呢個台，對營運唔係好大參與，佢拎咗錢出嚟亦都冇再注資，而家簽咗啲藝人同全職員工，開支都係大，聽聞坊間近佢哋嘅人話何慶湘係好勤力，好賣力，好辛苦周圍『𢯎』數，但係就有啲八卦嘢！」
鄭中基老婆余思敏晒恩愛相：
鄭中基友人質疑聲明有古怪？
陳志雲續說：「何慶湘做經理人淨係同Ronald接工作，佢太太嘅工作係唔接，呢度有啲拗撬出咗嚟，後來太太出咗啲Post，可能對佢兩個啲關係唔高興，後來攞晒啲數嚟睇，覺得啲數唔係好對，搞到而家咁樣。但係何慶湘嘅朋友相信佢唔係穿櫃桶底嘅人，鄭中基最後出呢個Post，話要中止工作關係，覺得佢做嘢有問題，呢個po嘅語調，有熟悉鄭中基嘅朋友就話唔係好似佢，佢唔會寫到咁撇脫，咁絕，咁勁，可能係人哋幫佢代筆都唔定，但係呢個真係唔知，但係有啲暗湧喺入面，而家應該係佢太太掌管返個營運。」「花生友」上身的陳志雲更說：「鄭中基後嚟再出Po話有情緒困擾，話唔定就是因為夾在喺兩個女人中間，一個係工作關係，一個係自己另一半，唔困擾都好難，哈哈，但我哋啲局外人真係唔知發生乜嘢事，都係剥花生，最緊要都係一家人和和氣氣，唔好影響小朋友嘅成長。」
李婉華籲網民勿認真：都係假設
不過，在直播期間有網民留言覺得現時未有證明事件牽涉感情瓜葛，為何兩位主持覺得100%是因為這原因？李婉華就叫對方勿認真並說：「我哋都係假設啫，呢件事學志雲大師話齋，你做乜自己講出嚟啫？你講咗出嚟我哋就可以討論㗎嘛，呢樣嘢唔係我哋特登去搲人啲嘢，係佢自己講，咁我哋就可以討論呢件事究竟發生咩事，因為係對我哋公眾有利益㗎，因為我哋個個都好喜歡鄭中基呀，就係唔想佢有事，我哋會估係咪錢呢？定因為感情呢？哎呀，如果佢家庭受到破壞，我哋係好傷心㗎！所以我哋要搵出個原因喇，從而可以喺呢件事去警剔我哋自己呀，警剔身邊人，所以我哋係討論。」
其他文章：
鄭中基突宣布與經理人何慶湘終止合作！合作開YT頻道4年大受歡迎：工作及道德操守有問題
鄭中基預告將「離開」！透露有個人情緒及健康問題 與經理人何慶湘終止合作掀討論
余思敏忽然貼金句講男女感情問題 網民聯想鄭中基「浪子」舊情史
鄭中基台北巡演淚崩 12歲女成最強應援 發聲明澄清國內巡演假消息
鄭中基演唱會丨古天樂驚喜現身全場瘋狂歡呼 難得開金口鄭中基預咗超時被罰
鄭中基演唱會丨自爆為人父後逢周六日唔開工 連呢位影帝約佢都拒絕
獨家丨鄭中基難再請囡囡上台：佢青春期呀 首做演唱會主辦呻紅館規例成日改
