70年代殿堂級歌手吸金力驚人 月入5位數兼多女埋身 曾因一首禁歌毀形象：傷害得好緊要
發佈時間：09:00 2025-01-03
70年代夥拍林子祥及威利組成「玉石樂隊」的大AL張武孝，他的一生可謂充滿傳奇，樂隊解散後，張武孝單飛轉唱廣東歌，憑住獨特的豆沙喉，大唱市井歌極受歡迎，連肥媽都曾大爆當年張武孝及李龍基最紅時期，一場騷已狂吸4位數。
大AL張武孝認當年唱歌搵到錢
日前大AL張武孝接受好友鍾慧冰的YouTube頻道「冰姐的花樣人生」的訪問，他坦承當年唱歌確實是賺到錢，而且又多女埋身，他笑言：「到我想識女仔嘅時候，我係唔識得點樣去追，因為後生係女仔去識你，點使去追女？」對於屢傳是癮君子，大AL張武孝直言：「點解啲人講嘢可以不負責任！」
相關閱讀：70年代殿堂級歌手現身聚會！曾被斬至命危兼傳吸毒 老婆係87年港姐
大AL張武孝屢傳是癮君子：
出身草根的大AL張武孝喜歡夾band，因參加歌唱比賽奪冠，獲邀在酒吧到酒店等夜場獻唱，之後樂隊獲佳視賞識，做節目《玉石之音》，用來跟TVB的《溫拿狂想曲》打對台，與譚詠麟、陳百祥等人是本港第二代Band仔。在節目上，大AL張武孝說：「嗰陣做音樂係搵錢多啲，以前一般人賺300蚊一個月，我可以搵到500蚊。唱酒廊真係搵好多錢，如果你識理財嘅話，不過我唔識理財，而且以為自己仲可以搵好多，我嗰陣住廣播道，500呎層樓大約20萬，我都可以搵3、4萬一個月，如果你識理財，真係可以儲錢買一條街用嚟收租，但係我鍾意使錢，所以好快就使晒。」
當年的樂隊組合瘋魔萬千少女，身為玉石樂隊主音的大AL張武孝亦不例外，他笑說：「邊個年代都有，不過到我想識女仔嘅時候，我係唔識得點樣去追，因為後生係女仔去識你，點使去追女？我最耐嘅女友叫鄭寶雯，不過最後都冇一齊，我係絕對相信緣份嘅人，我一生人真係好得意，好多嘢係求唔到，如果有啲特別嘅嘢，隨意又可以無心插柳，又可以好耐，我信呢啲就係命運，可能你一生人最愛嗰個唔係太太或者丈夫。」
直到大AL張武孝45歲的時候，在朋友介紹下認識到現時的太太，太太黃燕芳同樣是圈中人，1987年參加過港姐，與楊寶玲和李美鳳同屆，兩人認識八個月後就結婚，當時黃燕芳只得31歲，卻因廟街相士早有預言，認定大AL張武孝就是她的真命天子，兩人婚後非常恩愛，更育有一女一子，大女從事商場裝飾設計的工作，兒子身高190cm，目前做屋苑管理工作。
張武孝為家庭重返香港？
相關閱讀：大AL認同音樂養生願唱到90歲 露雲娜有健康良藥唔使打美容針
入行多年的大AL張武孝唱了不少經典歌曲，提到他的代表作，必定是《追龍》，雖然《追龍》早年被列為禁歌，不過每次登台都指定要求唱：「呢隻歌令到我搵到好多錢，歌詞係叫人唔好食，但係語帶雙關，講食白粉有乜苦處，食咗之後有乜嘢感覺，係講吸毒幾唔好，累死自己又累埋家庭，但係佢哋話意識唔好咪禁咗呢隻歌。」大AL張武孝續說：「但係到而家都好多人鍾意聽，我覺得點解仲有咁多人鍾意，首先我個樣似，嗰陣我係好瘦，其二又係豆沙喉，第三我又有唱粵曲，所以我每次登台，都有人拎晒工具叫我唱《追龍》，佢哋好開心，我咪照唱。」
大AL張武孝屢被誤會是癮君子
可惜亦因為這首歌，為大AL張武孝帶來不少影響，他說：「唔係誤會，係多到不得了，我嗰陣先發覺點解啲人講嘢可以不負責任，好多新朋友認識你，會話：『大AL，不如戒咗佢喇！嘥咗你。』又會有人捉住我隻手『你唱歌真係好好聽，唔好食喇。』跟住見到我肥咗，就會問係咪戒咗，甚至話佢個老友同我一齊食。」張武孝忍不住說：「雖然我唔係紅歌手，但係都好努力行到呢個位，你咁樣扑低我，對我影響好大，但係佢哋又冇責任，亂咁講，真係傷害得好緊要，搞到連拍劇都係搵我扮道友，因為入型入格得好緊要，唔使化妝，做番啲表情咪得。」
