80年代女星劉雅麗驚爆離婚！激罕受訪認因一事決回復單身 「奔七」後獨自生活不寂寞
發佈時間：09:00 2025-03-02 HKT
80年代已經活躍影視圈、曾在電視劇《蘇乞兒》飾演劉德華的女朋友劉雅麗，在1983年是首位以女主角身份參演荷里活電影的《Uncommon Valor》，當年與男影星Gene Hackman（真赫曼）合作，不過多年後與德國男友結婚後便外國，離開娛樂圈專心相夫教子，未有再現身娛樂圈。
「奔七」劉雅麗罕有地開金口談近況
不過近年劉雅麗曾返港出席朋友聚會，今年已經「奔七」的劉雅麗外貌與當年分別不大，依然充滿開朗氣息，臉上未見有太多歲月痕跡，日前劉雅麗罕有地開金口，現身劉雅麗（Alice）的YouTube頻道「我和劉雅麗有個約會Alice Lau」節目，兩位「劉雅麗」首次正面交鋒，感覺認真特別。
相關閱讀：80年代女星劉雅麗激罕現身！驚人凍齡樣與林建明聚會 曾是「劉德華女友」闖過荷里活
80年代女星劉雅麗驚爆離婚：
劉雅麗樣貌基本上與當年分別不大
劉雅麗以昔日一貫爽朗的笑聲與觀眾打招呼，除了戴上老花鏡外，樣貌基本上與當年分別不大，劉雅麗當年拍完電影《廟街皇后》後便離開香港：「我唔記得自己以拍過乜嘢劇集，只係記得最後一套演出嘅劇集係《蜀山》，之前拍《成吉斯汗》嘅時候仲大咗肚，嗰陣自己都唔知，仲去拍碌落山、騎馬嘅戲。直到拍完去咗澳洲旅行，有朋友話我肥咗，肯定係大咗肚，跟住驗孕真係有咗，不過我都係玩咗一個月返嚟先睇醫生。」她笑說：「其實我1989年就冇做而去咗美國，我一路都有返香港，因為我去咗做生意，係做內地入口批發，做咗25年。之後覺得經濟開始衰退，再加上個仔都大學業畢業，所以咪決定閂咗佢，如果我大把咪都話慢慢去玩，但係如果唔係話大把錢，將啲退休金投資埋落去，你冇咁嘅時間再做，不如揸住啲錢慢慢享受好過喇。」結果劉雅麗在59歲那年決定退休。
劉雅麗60歲生日正日離婚
提及婚姻生活，劉雅麗說：「雖然我哋係天主教，但係因為我老公結過婚，所以唔可以喺教堂行禮，只可以喺婚姻註冊處簽紙。我哋喺disco認識，嗰次係去朋友嘅生日會，同個經理傾傾吓，佢就介紹咗一個男仔畀我識，打完招呼就冇下文，點知3年之後，我哋再遇返，慢慢約下拍拖仲結埋婚。」劉雅麗笑說：「我同男友分手冇耐，一直都冇諗過結婚，而家嘅生活係全職去玩。」 不過劉雅麗坦言已經回復身單身：「喺60歲生日嗰日離咗婚，點解離婚呢？原來英文同中文係拍唔埋，但係我應承咗個仔唔離婚，喺個仔10歲嘅時候，我已經同佢講話媽咪好辛苦，想離婚，佢就話離婚間公司咪會閂囉？所以到我59歲，間公司閂咗又賣咗，跟住咪搞離婚，到我60歲生日啱啱搞掂，我仲多謝律師送咗份生日禮物畀我。」
劉雅麗回復單身周遊列國享受人生
回復單身後，劉雅麗周遊列國享受人生：「我老公佢唔係一個壞人，佢只係一個唔明白同唔體諒嘅人，但係我偏偏係盡我所能嘅人，對每一個人都係咁。我老公佢唔係好鍾意做嘢，一直我都係好平靜咁搞間公司，我覺得唔會做死人，只有係激死人，我對我老公一啲嬲都冇，嬲人只會係自己唔開心，但係如果我選擇原諒，因為中間隔住一個仔，萬一有乜事，最後只會傷害個仔。人生只不過係一個過程，個天安排呢個老公畀我，係有一個原因，到而家我都明白，點解會畀呢個老公我， 因為我而家另一個工作係幫人，主要係幫老人家，另一個係睇唔過眼嘅嘢就會幫，我而家幫緊一間工，佢哋喺一年蝕咗100萬，所以咪幫佢哋，慢慢發覺以前有好多經驗令我學到嘢，而家我好知足同感恩。」劉雅麗目前在拉斯維加斯獨自生活，但她一點都不寂寞：「我識咗好多朋友，同隔離嘅感情都好好，有一家仲係我以前男朋友嘅細妹，我哋係好朋友。」
相關閱讀：余慕蓮精靈打麻雀慶86歲生日！ 三年前一度留醫ICU 願望食得玩得瞓得
吳麗珠曾戀上歌神胞兄：
劉雅麗兒子仍未結婚
劉雅麗在節目上有公開家庭照，雖然老公是美國人，兒子本身是混血兒，但原來操得一口流利的廣東話：「我係堅持全中文，同佢傾電話你係唔知佢係鬼仔，佢同我傾偈就會認真講中文，我覺得呢啲嘢將來係用得到，所以一直培育佢。」劉雅麗還說兒子仍未結婚，目前在LA居住：「佢而家教緊書，佢正式係一個舞台劇演員，又讀過舞台設計，畢咗業之後做過好多多舞台劇，不過始終唔係太搵到錢，跟住做咗專門設計演員套衫嘅顏色，之後因為美國演員公會擺工擺咗耐，佢就去咗做助教，教吓啲中學生，冇乜嘢做又去做吓啲道具，舊年全職教書。」
