70年代小生經歷喪妻復出談圈中亂象！勁彈後輩唔記對白、指揮導演：好巴閉，支旗夠大

更新時間：09:00 2025-03-17 HKT
發佈時間：09:00 2025-03-17 HKT

73歲的郭鋒是70年代電視劇小生代表之一，他成為綠葉王之後仍然代表作不斷。郭鋒因為結婚40年的太太歐陽佩珊離世，情緒陷入低谷停工多時，早前復出再接拍劇集，在《黑色月光》中飾演演富商「卓昊天」表演受讚賞。近日郭鋒與吳浣儀接受「藝進同學會」訪問，以前輩身份大談圈中亂象。

郭鋒吳浣儀驚訝演員常遲到

郭鋒與吳浣儀批評後輩的行為，直言看不過眼。吳浣儀表示到電視台開工，卻發現有不少演員遲到，她說：「嗌極冇人入廠，原來可以遲到㗎咩？嗰時我哋遲一分鐘，真係癲咗咁，畀人鬧，King Sir企喺個廠出面。」郭鋒表示：「可以話，我哋舊一派嘅都有個壞習慣，早過頭。我幾差呀！啲壞習慣差到唔恨呀！」

郭鋒、吳浣儀大談圈中亂象？

郭鋒斥後輩NG當無事

郭鋒指以前拍戲用菲林，如今因器材更先進，演員似乎不再怕NG會影響他人。郭鋒表示：「以前NG要成場戲嚟過，唔同而家啲後生㗎，所以而家都唔使讀劇本㗎，問『（下句）講咩呀？』。」吳浣儀亦和應，「跟住話『嚟過』，個演員自己話再嚟過。」郭鋒表示現在年代不同，以前整個團隊都有實力，但現時只有部份是好演員，他說：「有啲都好嘅，但太後生，人生經驗唔夠，咁就死喇，佢哋又唔係科班出身，出嚟跟嘅又唔掂，咁死啦，咁拍咩？」吳浣儀認為器材先進了，卻令團隊更退步，因為台詞說不好，可以逐句讀再做後期剪接，「咁樣對演員都唔好啦！新人嚟講都冇得畀佢哋練習呀，啲戲點會好呢？」郭鋒更斥有後輩演員耍大牌，他分享：「有啲演員可以教返導演添，有啲好巴閉㗎嘛，佢支旗夠大呀！『睇Playback啦導演，做乜嗰度唔拍我呀』，哇……真係厲害。『導演你擺個shot啦，我做多次你睇』，呢啲演員真係犀利。」

相關閱讀：郭鋒大馬現身真實狀態令人驚訝金句王被奉為人生導師紛求教一件事

郭鋒指欠缺好劇本

郭鋒表示藝術圈有很多不平等，他說：「進步係好混亂，根本退步。要知道，戲劇、電視、電影又好，係一個藝術嚟，藝術！記住係藝術！唔係個個喺度嘻嘻哈哈，喜怒哀樂做齊就叫藝術，每部作品都有唔同派別，你先會去欣賞呢樣嘢。」郭鋒與吳浣儀認為現時香港欠缺好劇本，郭鋒表示：「睇完個故仔，但冇味道，有啲劇可能都仲有個中心點喺度，但使唔使咁多集呀？使唔使咁耐呀？所以如果接到一個好劇本呢，好開心！」郭鋒指近年他比較欣賞的劇本是《黑色月光》，「兩年嚟只係拍咗呢套，好幸運拍到佢。」