緬甸地震｜羅敏莊身在曼谷 拍片爆喊面青口唇白 老公陳國邦稱女兒仍未見到媽媽：最驚餘震

緬甸今日（28日）地震，強度達7.9級，泰國曼谷目前已宣布進入緊急狀況，多地有強烈震感。據香港天文台報告，事發時間為香港時間下午2時32分，震中位於北緯21.79度，東經96.05度附近，震源深度約97公里 。中國地震台網測定，今日下午2時20分在緬甸實皆省西北部（北緯21.85度，東經95.95度）發生7.9級地震，震源深度30公里。據悉，移泰多年的藝人羅敏莊（MiMi）在地震發生一刻身處泰國，她指目前她身處住所樓下，而女兒則身處學校，由學校職員照顧，正安排車送女兒回家。而羅敏莊丈夫陳國邦則身處香港，他回覆《星島頭條》時指已經與太太進行視像通話，知道目前太太母女平安。

緬甸地震｜羅敏莊：感受到好強烈好強烈嘅震盪

羅敏莊回覆《星島頭條》時說：「我依家身處喺曼谷，我頭先大概兩個鐘頭前，感受到一個好強烈好強烈嘅震盪，咁初時我唔知，我以為我自己頭暈，跟住我聽到有啲裂嘅聲音，喺屋企都好驚吓，我即刻跑出露台度，睇吓究竟係我呢度嘅問題，定係全世界嘅問題，即係成個曼谷嘅問題呢。」她指從其住所看出去，不少樓宇都在搖擺，「有啲高嘅樓通常有Skypool，啲水都出晒嚟，個震動係非常強烈，其實我之前都喺台灣感受過，係冇呢次咁大，呢個震盪係非常之犀利。我當然好驚啦，都唔知應該點做嘅時候呢，我就諗不如我都係落街睇吓有冇其他人喺度，因為我又見到個街有啲人走咗出嚟，但係啲人又冇嗌，我咪即刻換件衫即刻走落去屋企樓下度等，其實暫時嚟講，依家我都係喺屋企樓下等緊。」

緬甸地震｜羅敏莊：可能嚟緊都仲有餘震

羅敏莊指政府呼籲市民到空曠地方暫避，因此她亦與街坊們在屋苑地下等待，「我見到我嘅屋苑裡面有好多街坊啦，有啲街坊喺走動嘅過程裡面好慌忙，有啲係沖緊涼就咁攬住條毛巾，圍住條毛巾就咁行落街，有啲外國人著住條底褲就咁行落街，冇辦法，有啲人冇（著）鞋啦，依家我側邊啲人，有啲外國人呢都帶住BB，你聽到有啲BB喊聲，其實大家依家都喺度等緊政府嘅呼籲，因為政府呼籲我哋，大部份嘅人喺空曠嘅地方，安全嘅地方留喺度，唔好走嚟走去，因為可能嚟緊都仲有餘震，但屋苑嘅人就照顧得我哋好好嘅，屋苑管理人員就派水畀我哋，咁我哋啲街坊全部都喺度等，已經等咗兩個鐘㗎啦。」

緬甸地震｜羅敏莊女兒身處學校由職員照顧

至於女兒情況，羅敏莊則說：「而我個女就啱啱喺學校，佢個學校都照顧得佢哋好好，安排緊車送佢哋返屋企，不過，依家曼谷出面嘅交通都癱瘓得好犀利，所以我哋人無事，都好安全，但我知道有啲起緊中樓宇呢，有一幢冧咗，其實都係好唔開心囉，因為可能都會有傷亡，希望天佑全世界嘅人啦。」

緬甸地震｜羅敏莊再拍片報平安

直至傍晚，羅敏莊再度拍片報平安，指目前她仍在屋苑樓下等待。從她拍攝的現場影片所見，她身處的地方尚算安全，她說：「好多人問我你依家安全嗎？其實我哋依家一路都喺屋企樓下嗰度等緊，睇吓宣佈可唔可以返上樓，其實呢度都暫時嚟講係安全嘅，但聽聞可能會有另外一次嘅餘震，所以我哋依家都喺度等緊，安全先返上去，呢度嘅管理都好好。」

緬甸地震｜羅敏莊上樓後再拍片指身上殘餘搖蕩感

到晚上約8時許，羅敏莊指因有太多人發訊息給她，自己不去一一回覆了，故此再拍影片告訴大家最新情況，她表示：「我就啱啱返咗上樓，依家暫時嚟講係安全嘅，咁希望佢冇餘震啦，就算有都唔好咁犀利，因為頭先個搖蕩真係好厲害，我依家上咗樓都好似仲喺度搖晃緊，好得人驚，我依家暫時係安全，多謝大家關心，多謝你哋。」另外羅敏莊亦指於當地大約9時，其女兒仍未返到屋企，因為現時全曼谷的交通非常擠塞，故此現時仍在校巴當中，羅敏莊將會繼續等女兒回家。

緬甸地震｜羅敏莊老公陳國邦已聯絡妻女

而羅敏莊丈夫陳國邦則身處香港，他接受《星島頭條》電話訪問指，當泰國發生地震時，自己正與學生們進行拍攝工作，到有空看電話時，已是地震後一小時，看到太太羅敏莊電話傳來的消息，他即時放下所有工作，以視像致電給Mimi，當時Mimi已經在街上，知道她的驚慌已過了，最驚是出現餘震，因地震後有建築物倒塌，當地消息較為混亂，他說：「我知道Mimi情況安全，也聯絡到女兒陳禛，學校已安排車輛載所有學生返家，只是不知道女兒何時才能見到媽媽，我唯一擔心的是，不要在女兒回家途中有第二次餘震，否則信息更混亂，便聯絡不到她。」陳國邦相信人類遇到天災時，人與人之間會互相幫助，片段中見到當地有市民情緒激動時也互相安慰。

緬甸地震｜陳國邦稱羅敏莊與女兒料下月返港

陳國邦透露一家在泰國居住的單位處於17樓，Mimi在家中看到對面大廈泳池的水搖瀉而下：「地震後一定有餘震，現在視乎強度有多大，處於強大未知之素下，我覺得最重要還是女兒返家見到Mimi我才安心，有Mimi照顧女兒我會放心，後續有太多事，例如，所住的大廈是否安全等。」

問到會否飛到泰國安撫妻女？陳國邦表示，若然飛的話，當然是他們母女二人飛返香港：「我飛到泰國也沒用，原本他們二人已訂了4月7日的機位返港，因4月是當地新年，女兒於5日放假，現發生這事情提早返港沒問題，但很多事情也不知，例如機場運作有沒有問題，或因這事有多少人突然間離開泰國一段時間，甚至乎去不去到機場也不知，所以我會密切監察情況。」

緬甸地震｜羅敏莊拍片面色蒼白

在發生地震一刻，羅敏莊拍片表示自己身處泰國，她在片中面色蒼白且說話口震震，神色非常驚慌地說：「曼谷地震呀，我好驚呀，成間屋震晒，驚到爆呀，我而家隻手仲震緊呀，其實都唔知會唔會死呀，我而家拍定條片，擺喺度唔係講笑。」其後羅敏莊又從住所跑到街上說：「好驚呀，而家啲人走晒出街，從來冇聽過泰國或者曼谷有地震。」

為了令女兒有開心的學習環境，羅敏莊與陳國邦早於2016年已在泰國曼谷置業，當時兩人以300多萬港元購入一個鄰近BTS站的約850呎單位，並在2022年7月疫情緩和時，兩母女移居泰國，陳禛在泰國升讀哈羅國際學校year 5，一年學費約17萬港元。羅敏莊曾大讚當地有無敵靚校園，選擇泰國亦因跟香港距離近，有突發事件都可以幾小時就回到香港，陳國邦近年則留在港工作。