「40億千金」蔡頌思婚禮賓客身份尊貴顯赫！自認是史上最貪心新娘 退出選美決轉行
發佈時間：17:01 2025-03-31 HKT
已故百億「海產大王」蔡繼有孫女、31歲蔡頌思（Jocelyn）大前日（29日）與日籍金融才俊老公Michihiro Nakaguchi在四季酒店舉行婚禮，蔡頌思婚禮由場地、佈置、禮服與及賓客等等安排，極具奢華兼一等一排場，單單在蔡頌思身上金器已經相當誇張，龍鳳鈪掛滿身，頭上又戴有金鳳冠，頸上的金鍊比PIZZA還要大，果然富貴逼人。
蔡頌思是史上最貪心新娘
成為人妻後，蔡頌思在IG連環貼上婚禮當日的場面，今日貼上一套中式禮服的相片並說：「聽講我係史上最貪心嘅新娘，破咗酒店記錄，一日換7條裙，啲造型都未post晒。不過我諗票選最高嘅就係呢一條中式禮服，多謝 @viviennetam 為我打造世界上獨一無二嘅呢條中式禮服，老公著上傳統日式和服，應該係史無前例嘅配搭。多謝咁多位，特登前嚟見證同埋慶祝我哋結婚，多謝你哋令到我人生中最重要嘅日子咁難忘同圓滿。」
相關閱讀：「40億千金」超豪婚宴曝光！巨型流星錘龍鳳鈪掩蓋半身勁搶Fo 換禮服次數打破酒店記錄
相關閱讀：31歲「40億千金」晒閃爆巨鑽宣佈獲男友求婚成功！曾選港姐爸爸為全國政協常委
蔡頌思與日籍金融才俊老公Michihiro Nakaguchi的婚禮大前日在四季酒店舉行，蔡頌思的爸爸蔡冠深是香港新華集團主席，同時亦是全國政協常委及香港中華總商會會長；媽媽蔡關穎琴是新華集團顧問及法律總監，亦是團結香港基金顧問，曾獲銅紫荊星章、榮譽勳章、太平紳士等名銜，特首李家超上台祝賀，前律政司司長梁愛詩為一對新人證婚，還有不少政商界兼名人好友出席，見證蔡頌思的人生大事。蔡頌思的婚禮相當夢幻，似十足公主和王子的童話式婚禮。現場有設有不少以粉色為主的小色，喜帖設計亦見燙上金邊，還有多張巨型婚紗相，回禮亦選用了粉紫色包住的朱古力。嘉賓方面，蔡頌思邀請了不少好友，包括恩師張達明、TVB高層樂易玲，與及在選美場上認識的女生。
對於與老公的相識經過，蔡頌思接受傳媒訪問時表示老公居於香港，從事金融工作，二人透過朋友認識對方，她笑說：「我第一次見到佢就覺得好端莊，佢嘅英文好流暢，同我傾到好多偈，我諗可能香港人好鍾意去日本，其實我都係問佢日本有咩玩、日本有咩食，所以我覺得有日本老公最開心就係，我好多藉口不停去日本。」婚後二人將會繼續定居香港，蔡頌思又稱家人對她揀老公並無太大要求，「純粹就係對我好、有責任心，比較端莊嘅人佢哋就OK。」不過溝通問題或文化差異倒是無可避免，再加上老公目前不懂講中文，與家中的長輩溝通多少有點隔閡，飲茶時大家一輪嘴講，有時都難免忽略了他，「可能要用英文翻譯畀佢聽，或者佢唔係太明，有時佢都會話唔緊要啦，你唔使翻譯畀我啦，但係佢就好似好悶咁。其實我完全明白呢個感受，因為佢喺日本講日文嘅時候，我都係一樣坐喺度唔出聲，又唔知佢哋講乜，所以都有少少語言障礙。」
相關閲讀：環球小姐2024丨蔡繼有孫女蔡頌思第三度選美落敗而回 曾與TVB藝人傳緋聞好困擾
蔡頌思打破伴娘魔咒升級準人妻：
蔡頌思婚後不會再選美
蔡頌思是選美常客，曾參過不少選美，包括《2020年度香港小姐競選》、《尾二一屆口罩小姐選舉》、《環球小姐2024》、《國際潛水小姐2024》，蔡頌思直言參選只為搏取演戲機會，想要多張拍劇入場券。不過蔡頌思已正式嫁作人妻，她直言不會再選美，並逐步退出幕前：「我嘅選美生涯都完㗎喇，跟住我就諗我人生另一個階段，我可能會慢慢做返幕後嘅嘢，亦都會返屋企公司嗰度幫手等等啦，所以就係人生另外一頁。因為當我有自己嘅家庭，賺錢係好緊要，好多嘢都需要經濟支撐，雖然演藝路上好開心，我都好enjoy，但始終喺賺錢方面我未係好理想，所以都想做返生意，去support返未來嘅家庭。」
