陶大宇直認同富貴花旦好夾！讀「Jessie 」冇次嗌得準：真係講錯冇人糾正過我
發佈時間：20:30 2025-03-31 HKT
阮兆祥、梅小惠和江欣燕主持的TVB節目《友乜唔講得》在昨晚（30 日）的嘉賓是有「師奶殺手」之稱的陶大宇。入行逾40年的陶大宇曾是TVB一線小生，主演過不少經典劇集，90年代主演的《壹號皇庭》、《刑事偵緝檔案》及《青出於藍》等劇集都叫好叫座，令他人氣爆升，成為師奶殺手。要數陶大宇經典劇集作品，不能不提《刑事偵緝檔案》，而當中流傳至今的話題，是陶大宇在劇中將郭可盈角色英文名 Jessie 讀錯做車匙。
陶大宇將Jessie 讀車匙從來沒有人糾正
陶大宇指是「純粹真係講錯」，並笑言若大家細心留意，會發現他不但將Jessie 讀車匙，還會讀錯做「Jack 匙」、「姐匙」等，但令他最感離奇的是，從來沒有人糾正他：「其實如果大家抽絲剝繭，我嗌郭可盈個英文名，係嗌咗三至四個唔同音架，但都冇人糾正過我，就連郭可盈都冇糾正過我架。總之係（讀到）錯晒，冇一次嗌得準嘅，原來咁都得架喎原來。」
相關閱讀：陶大宇自爆為李珊珊頂酒斷片 爆頭流血枕頭全濕 誤打誤撞靠商演繼續生存
陶大宇直認與郭可盈很夾
當年陶大宇和郭可盈憑《刑事偵緝檔案》被觀眾視為螢幕情侶，在節目上，陶大宇直認與郭可盈很夾，並謂郭可盈選完港姐第一部電視劇，就是和他合作《Catwalk 俏佳人》，問到當時有否以前輩身份教郭可盈，陶大宇說：「唔使教，可盈好聰明架，好快上手。」又大讚當時公司甚懂宣傳之道：「當時喺電視劇入面都算創先河，因為嗰時係一班港姐演啦，有啲有名次、有啲係落選嘅，為咗令人熟悉佢哋，劇入面全部用佢哋真名，我就用番劇名。」
陶大宇坦言拍《刑事》苦多於樂
對於當年拍《刑事》，陶大宇坦言苦多於樂，並以「一片空白」形容拍後感：「拍得太多呀，同埋咩都關你事，變咗無咗感覺。你知電視劇跳拍架嘛，一輯入邊可能有八單 case，但你唔係逐單 case 拍，係一日拍兩、三單 case（PS 跳嚟拍，因為要就場景），所以係亂晒大籠架。」陶大宇又大方分享一次發忟憎的經歷：「三句對白架啫！我好記得嘅，我只係做一個鏡頭啫，就係『咯咯咯』（敲門聲），林漪娸Madam 話 come in，我就入去話：『Madam，成件事 close file 架喇，我哋可以唔使再查落去㗎喇』。就係咁簡單啫，我係冇辦法一個 shot 講到，攰呀！我連 madam都講唔到，終於嗰句對白要分開三個 shot 拍。」陶大宇續說：「嗰時喺四個月裏面，我同忠仔（梁榮忠）差唔多每一日只係平均瞓咗三粒鐘，但都開心嘅，大家一齊捱，見個對手仲多過見自己阿媽。」
相關閱讀：61歲陶大宇驚爆已結婚 老婆正面容貌曝光 林建明無預警爆料陶太驚訝甜笑
陶大宇自創「掩額頭」Meme圖全因角色太平平無奇：
陶大宇創下不少「網絡經典」
除了將 Jessie 讀錯做車匙外，陶大宇創下不少「網絡經典」， 其中「掩額頭」動作的起源，是因為當年在劇集《心花放》的角色平平無奇，陶大宇於是自創小動作突出角色：「呢個我係刻意擺上去，等於賭神一偷雞就摸戒指 一樣，又或者發哥以前嘅『係咁先』。因為劇入面個角色冇嘢做架，做啲嘢好濕碎，冇乜戲好演、冇性格，我就心諗不如加啲小動作，將我嘅喜怒哀樂都擺喺呢 個動作度。」陶大宇又謂最難忘是有一名有心網民，竟將他在劇集中第一集至三十集的掩頭面動作全數逐一 cap 下，令他嘆為觀止。 陶大宇的演戲設計靈感來自發哥原來亦有原因：「嗰時訓練班啲教材全部係發哥嘟姐架，《上海灘》、《網中人》咁，所以嗰時洗晒腦架，個個同學都以為自己係鄭裕玲同周潤發。」他又謂當時很羨慕比自己早出道、而又已經備受力捧的「無綫五虎」，就連「登台最賺錢」的覺悟，也是源自五虎：「其實唱歌係為咗搵食架啫。嗰時好興登台，見到五虎登完台就換車好羨慕咯。所以做藝人個袋入面一定要袋住幾首歌，將來有機會時就有得用。」
