75歲前《愛回家》男星徵婚 首爆40年前因病離婚被拋棄 眼紅李龍基想搵伴：性生活已經唔關我事
發佈時間：13:10 2025-04-26 HKT
75歲填詞人黎彼得曾在《愛·回家之開心速遞》演「豹叔」，令他晚年再有代表作。不過近年他離開TVB後已甚少有演出，近年成為YouTuber於網上節目《玖噏秘笈》中評論大小事，曾因狠批多位後輩引起熱話。黎彼得指自知說話易得罪人，因此最新一集《玖噏秘笈》不談他人，改談自己的私事，他更公開徵婚，表示：「希望有個紅顏知己、靈魂伴侶都好。」
黎彼得為曾嘲李龍基忘年戀道歉
黎彼得曾嘲李龍基與未婚妻Chris王青霞發展忘年戀，勸李龍基「屙篤尿照吓個樣」，更提醒做人要有本錢及能力、人貴自知。但日前黎彼得在節目中向李龍基道歉，他說：「我同情佢多過指責佢，我本身同佢好多共通點，我哋都70幾歲，無理由佢有件嘢執尾會，我又冇㗎嘛，自然會眼紅啦……變咗咪五十步笑百步囉！」更指自己語氣差，希望李龍基有怪莫怪，「同基哥講句唔好意思，對唔住。」
相關閱讀：75歲黎彼得被送入深切治療部 肺花感呼吸困難 插尿喉要輸兩包血
黎彼得離婚40年突然公開徵婚？
黎彼得單身40年：唔想負咗人
黎彼得在節目中分享想學李龍基找個伴侶，公開徵婚。他表示離婚至今孤枕獨眠逾40年，之前一直不想找伴侶是因為不想辜負別人。黎彼得說：「怕咗唔敢再搵，原因就係唔想負咗人，自己又冇七層樓……唔好講阿基哥喇……總之照下塊鏡，憑咩再去搵另一半，因為而家嘅女人都係好需要男人支持，咁我當然想搵個有錢女人，但有錢女人點會鍾意你老人家，個樣又唔好，講嘢又衰，好多時自己自量，要懺悔。」
相關閱讀：黎彼得再度炮轟伍仲衡犯眾憎！直認兩人絕對陌生 因一事轟對方：自己知自己過去嘅事
黎彼得首公開40年前因病離婚
黎彼得曾表示早年錯過真愛後，草草走入婚姻，最終結束3年婚姻，指前妻離家令兒子心理受到影響，他則成為帶子洪郎。黎彼得在節目中公開40年前離婚的原因，「我當年病，好慘，久病床前……當時佢（老婆）試過揹我去睇醫生，因為我腰骨生骨刺，連床都落唔到。咁如果你係一個女人，嫁着個老公仲要揹佢去睇跌打，男人最麻煩就係腰有事，咁我都唔想，但冇辦法……嗰輪又失業，點解？因為肝炎，個醫生同我講，唔好做嘢喇，因為你搵到錢都唔夠醫病。咁如果你係女人，你都下堂求去啦，點會陪住呢個老公，老傷病弱殘。」
相關閱讀：黎彼得突點名MIRROR連珠炮發：都唔係歌星嚟 三字形容伍仲衡狂焫火頭
李龍基大談性生活與王青霞一周行房「十幾次」？
黎彼得入院半個月生找伴念頭
黎彼得早前因流感入ICU深切治療部，透露有肺花、呼吸困難等情況，留醫半個月才出院。黎彼得因大病一場而心生找伴念頭，他指看到很多病友都有親友探望感羨慕：「點解我冇人嚟（探）呢？係……間中有個老友，但嗰啲係老友，唔係愛人。我點解一個天煞孤星都冇親戚朋友？朋友得一件半件囉，已經好好，但我覺得人哋嚟探病，我又孤苦伶仃……觸景傷情，令自己覺得……唉……都唔好繼續孤獨啦，不如立下心志，而且70幾（歲），我見基哥都可以執番件，我都有機會嘅，要求低啲都得掛？」黎彼得指年紀已經很大，過去做錯的事不怕重提，他選擇懺悔，「希望有個紅顏知己、靈魂伴侶都好，性生活已經……Sorry喇，唔關我事喇，而家希望有個靈魂伴侶，對我呢啲孤獨老人能夠紅袖添香，就算有咩頭暈身㷫，有人照顧吓、煲啖湯你飲，冇得頂啦！如果兩腳一伸，唔緊要，搞身後事囉！」
