晨光追擊│「康樂高球」勢成焦點

晨操動態

更新時間：15:30 2025-04-12 HKT
發佈時間：15:30 2025-04-12 HKT

焦點值得追捧

「焦點」今季加盟游廄第二戰即贏馬補中。

第三場第五班一二○○米：「焦點」先後在三個馬房服役，之前在呂、鄭廄合共十六戰，全部三甲不入，最叻只跑兩次第六，來到今季加盟游廄終有進展，首戰跑谷草千二得第四，接戰再跑千二即贏馬補中。

大前仗「焦點」改攻谷草一哩，僅以鼻位之微飲恨，前仗再戰又一次以短距離見負，這次又一次挫下之後補中的「冠寶駒」，而頭馬「閃亮老撾」是在排一檔一步不蝕下贏馬。

「焦點」上仗熱捧失手，明顯輸在休息唔夠，只唞了十一日就出賽，也因如此拼罷此戰之後，練者安排馬匹唞了近兩個月，好讓馬匹體力復元，同時因為唞夠有充裕新鮮感，跑番短途更合進取，馬房近期強勢，值得追捧。

康樂高球力爭三捷

「康樂高球」有望取得季內三捷。

第十一場第三班一四○○米：「康樂高球」初出即爆冷，排一檔起步沿途跟守好位，入到直路在「天賜喜」內側拍住鬥衝，結果直路轉了兩次腳之下仍力拒來犯，睇番「天賜喜」之後兩戰全勝，季軍「帥帥友福」亦好快又贏馬，水準高到不得了。

「康樂高球」再出孭到一三四磅並排九檔，早段走三疊，轉彎走五疊，可以話要蝕的都蝕晒，最終仍贏到全無對手。前仗此駒升班未能將長勝紀錄延續，只怪班德禮太論盡，遲遲未能在直路上望空，以致馬匹受困，跟手更失去步韻，最後「康樂高球」僅以頸位之差不敵，表現已算不俗。上仗首度扳上千四，第一次在變化地角逐，同時也是首次用快放戰術，再看強如「首飾天空」都係其蹄下敗將，目前只評七十五分當然未有阻力，今次有望取得季內三捷。

兆文

↓立即下載星島頭條App↓