頭條戲場 - 《長腿》 唔好帶腦入場 | 頭條戲場
好記得年初，獨立電影製作公司Neon公開《長腿》首支宣傳片，當時未有電影名，片中只有一張陳年家庭照及一張案發現場相片，相中是一位小妹妹的下半身，片段中至尾聲是令人心寒的報警錄音， 一個男人好急速咁話，「佢唔係我個女」。《長腿》於美國上映後，外國影評盛讚「近10年來最恐怖電影」，爛番茄又有100%好評、IMDb亦有8.3高分，Marketing真係好重要，你唔係唔入場呀？不過觀眾反應好兩極，有人彈終極爛片，有人讚不可多得，觀影期間我只係覺得好不安，好壓抑，如果你本身已經好壓抑，可能要諗清楚先好入場。（上映中）撰文：廖思慧
宣傳恐怖片，10部有8部都話自己史上最恐怖，習慣就好，唔通話其實唔驚㗎，全部用聲效呃你咋，咁咩？《長腿》恐怖之處唔係因為Jump Scare，其實失驚無神嚇鬼你場口唔多，一隻手數得晒，亦唔係因為血腥，係全片都有種令你毛管戙的不安感，即係個vibe好邪惡。
第6感查案大晒
導演Osgood Perkins父親是經典驚慄片《觸目驚心》中，飾演有戀母情意結的變裝癖殺人犯，已故演員Anthony Perkins，做仔嘅都踏足電影界，先做演員後轉型導演，拍親都係恐怖片，不過導演自稱從來唔睇當代恐怖片，留意返係當代。《長腿》故事以90年代發生的一系列離奇連環殺人案開始，因為有超強第6感，FBI探員Lee Harker（Maika Monroe飾）奉命調查連環殺人案，叫得連環當然唔止一單，案件共通點都係死全家仲要係老竇殺女，而個女咁啱都係14號生日，然後命案現場都會有一張署名「長腿」的奇怪圖案信件。
因為第6感，探員Lee Harker覺得係咁就係咁，明知連環殺人犯在某間屋，有探員死咗，依然唔call支援單拖衝入去，好多位都睇到嬲。加上「長腿」跟邪教有關，第6感加邪教，所有冇邏輯的事都立即變得有邏輯，不過本文條題已經講得好清楚，「唔好帶腦入場」，大家請記住呢個初心。全片瀰漫好多惡，包括邪教的惡及原生家庭之惡。特別要讚導演用冷色系拍攝的畫面好靚，睇恐怖片睇到睇展覽咁，至於金像影帝尼古拉斯基治，出場唔多，好彩咋。
頭條戲場
