KellyChu - 義工住戶齊為過渡屋「喜盈」外牆添「新衣」 | Executive日記
KellyChu
2024-03-11 02:00
字體大小
社協營運嘅過渡性房屋項目「喜盈」，去年10月起入伙，入住率已經爆滿。而為咗為社區注入活力，社協亦同「畫美麗香港」發揮創意，搞搞新意思，合辦一個壁畫活動，去年11月開始，同450位義工一齊，喺「喜盈」長達80米嘅外牆，畫上荃灣同葵青區嘅特色景點，昨日作品正式完工，小妹到現場一睇，真係色彩斑斕，耳目一新！
「畫美麗香港」司庫陳曉珊話，壁畫創作邀請咗商界、學校、社區志願義工，同約30名「喜盈」居民一齊完成，主題糅合荃灣及葵青區嘅特色景點，包括城門水塘、大帽山、青馬大橋等，配以花鳥、蝴蝶等主題。社協副主任施麗珊形容，外牆原本「好齋」，不過依家變咗道美麗風景，街坊都好鍾意。
73歲「喜盈」住戶司徒女士形容，之前見到有義工畫壁畫，自覺「要出一分力」，所以自己都有抽時間參加。佢以前住油麻地，月租8000元、面積百多方尺嘅單位，搬到「喜盈」後，居住環境改善，鄰里間互相照應，笑言「（輪到公屋）未必想出去。」
另一位7旬住戶朱先生就話，以前住深水埗50方尺嘅板間房單位，月租3000元，搬入「喜盈」後，月租僅2500元，單位面積更有150方尺。佢又稱讚機構舉辦多項活動，覺得依家住得十分開心。
Kelly Chu
「喜盈」，去年10月起入伙，入住率已經爆滿。
施麗珊形容，外牆原本「好齋」，不過依家變咗道美麗風景，街坊都好鍾意。
更多文章
