梁家權 - 趁墟有食緣 | 好味大過天
![](https://image.hkhl.hk/f/686e386/0x0/100/none/eb2cea06fa2accb2c888c900a7e60d04/2024-07/18_11.jpg)
每次山長水遠入到大埔,有時間的話總會去大埔墟街市熟食中心,即使已經半飽,都要重溫某些味道。這天午前抵達,應該還有魚蛋粉吃吧,於是一支箭飆上2樓,嘿,冇開!大把選擇,走去數十米之遙另一檔吃蝦籽撈麵。吓,又冇開!
「洪記平日失驚無神都會唔開,何況休漁期冇魚打魚蛋就更加唔開啦!至於平記,呢兩個禮拜休息啊,遲啲再來食麵囉!」大埔街坊好心相告。又未至於失望,畢竟這個全港最大的街市熟食中心有幾十個食檔,發記就在眼前,檔前圓有吉位,何不吃炸兩,並且到隔籬的有記茶果買缽仔糕和糯米糍。不明白有記為何只在周末周日才賣白糖糕,平日做一兩底有何不可呢?
洪記午後一兩點鐘便收檔,只賣魚蛋粉,過去能吃到魚蛋粉,通常都會在對面的發記叫1碟炸兩。吃了這麼多年,它的炸兩很少令我失望,油炸鬼冇過氣,檔主冇偷雞用齊一孖,師傅不手緊,用足腸粉完全包住,但想要有蝦米,要加4元。不過,蝦米太多太大隻,有喧賓奪主之嫌。
因為從來都是搭單吃發記的炸兩,所以沒看過發記的菜牌,也沒吃過主打賣的粥,這天偶然瞄一眼菜牌,發現有白灼豬肚、粉腸。咦,何不灼一碟試下?既然有粥賣,有豬雜本來不足為奇,但奇就奇在只有豬肚和粉腸,卻找不到豬腰、豬膶、豬心的蹤影!冇所謂啦,有緣遇上,即管叫一碟。
雖然只是簡簡單單的白灼,墊上幾瓣生菜,澆點豉油和熟油,哈,幾好食喎,吃得出豬肚和粉腸都是鮮貨。店家見我吃得愜意,帶點自滿的說:「每日入貨㗎!」新鮮,果然冇得輸!咁,下次要試生滾粥了。
梁家權
最Hit
稻香再推老友記早茶優惠!長者$18.8任揀2籠點心 午市下午茶粥粉麵飯$28起 新推$48水餃濃湯雞
2024-09-07 00:03
男子患脂肪肝靠喝1飲品 2周後成功降血脂血糖 不用吃藥兼減3kg
2024-09-06 13:40