KellyChu - 載歌載舞 派聖誕禮物 米奇夥迪士尼義工往兒童醫院送歡樂 | Executive日記
KellyChu
2024-12-23 02:00
字體大小
聖誕節係普天同慶的日子，米奇老鼠走出香港迪士尼樂園，聯同一班迪士尼義工隊，上周五到訪大口環根德公爵夫人兒童醫院，為80名病童同佢哋嘅家人舉行「迪士尼『童樂遊』—聖誕大派對」。米奇仲走入病房，探望未能參與派對嘅病童，向佢哋送上聖誕禮物同節日祝福，分享迪士尼嘅奇妙聖誕。
迪士尼義工喺醫院戶外空間舉辦大派對，當中嘅攤位遊戲經過細心安排，有互動元素之餘亦重視輕巧，讓病童容易參與。來自娛樂事務部嘅迪士尼義工，表演歌唱、舞蹈、擊鼓同雜耍，病童睇得開心投入；米奇老鼠更驚喜現身，為病童喺治療旅程上打氣。
15歲嘅Marcus同爸爸一齊參與今次派對。Marcus嘅爸爸話，Marcus患有罕見嘅遺傳病，需要一直住醫院，從未想過去迪士尼樂園玩，當知道米奇老鼠同迪士尼團隊來一齊慶祝聖誕，感到非常開心。大口環根德公爵夫人兒童醫院行政總監陳金海醫生話，醫院照顧嘅病童，大多數患慢性疾病，無法自己輕易前往迪士尼樂園。米奇老鼠同迪士尼義工今次來訪，為病童帶來快樂、笑容同勇氣，讓他們有更積極嘅心態對抗疾病。Kelly當日亦係義工之一，一起在病童同家長面前跳舞唱歌，又幫佢哋戴上迪士尼卡通人物嘅頭飾，見到佢哋笑容滿面，好感動亦好開心。
米奇同香港迪士尼樂園度假區首席財務總監施楠帶埋聖誕禮物，到病房探望病童，禮物嘅設計好特別，仲好有迪士尼元素，有助兒童喺住院期間更有家嘅感覺。小妹知道，「迪士尼『童樂遊』」醫院探訪項目喺今年4月首度推出，團隊先後到過香港兒童醫院、伊利沙伯醫院探訪病童，為兒童患者帶來歡樂同鼓勵。
KellyChu
迪士尼義工表演歌唱同舞蹈，病童睇得開心投入。
迪士尼義工表演歌唱同舞蹈，病童睇得開心投入。
更多文章
