KellyChu - 探訪「流浪貓體驗館」 何永賢：可愛到融化 | Executive日記
KellyChu
2025-01-28 02:00
字體大小
原來，房屋局局長何永賢同Kelly一樣，都係貓奴！佢近日就同立法會議員鄭泳舜、梁文廣、陳凱欣、梁毓偉，一齊到海麗商場嘅「貓貓爪家」，探訪參加房委會「共築．創業家」計劃嘅創業青年。期間見到一群可愛貓貓，局長笑言：「我們都被融化，忍不住一人抱着一隻，餵牠們吃貓糧，又和牠們玩，了解牠們的故事。」
何永賢喺FB發文話，「貓貓爪家」推廣社會對流浪貓認知，有貓舍待領養嘅貓貓駐場，市民可付費體驗同佢哋相處，為支持照顧流浪貓出一分力；而相處後，如果同貓貓投緣，可以向「貓貓爪家」查詢領養事宜。另外，「貓貓爪家」仲舉辦貓咪主題手作班、貓貓飼養課程，亦會寄賣寵物用品，平價出售臨期貓糧，減少浪費。
「貓貓爪家」嘅創業青年Raymond同Michael就透露，「貓貓爪家」一般有8隻貓，但最近1隻叫「才子」嘅5歲貓貓，已成功「爪」家，大家都覺得高興！另外，由於體驗館唔提供餐飲，「貓貓爪家」就同商場茶餐廳合作，推出「貓貓爪家」優惠券，等市民以相宜價錢光顧，同其他商舖互動互利。
何永賢形容，議員體驗過後，都覺得年輕人創業確實有諗法，都話會幫手宣傳。房委會亦會檢視計劃，同社會各界攜手，為青年創業提供更多機會同空間。
KellyChu
