和牛咁好味，但原來日本人以前係唔食牛架！
睇文章前，睇下呢啲先。
A3。A4。A5。雪花。霜降。油花。大理石紋。入口即溶。神戶牛。松阪牛。近江牛。宫崎牛。佐賀牛。飛驒牛。米澤牛。但馬牛。山形牛。前澤牛。千屋牛。仙台牛。大和牛。伊萬里牛。鹿兒島牛……如果你睇到一半，已經開始不能自已，流晒口水有反應，咁你就係和牛迷喇。和牛，日本國寶，全球所好。和，就是日本。和牛，就是日本的牛。但原來，和牛並不完全來自日本，日本人以前亦唔食牛架。
Sukiyaki壽喜燒，日本人喜慶才食，是和牛中最矜貴食法。
入口即溶神話
不如咁，一邊食和牛，一邊聽古仔。
呢度係銅鑼灣登龍街Hana華小料理屋，出名鹿兒島產極品黑牛。鹿兒島是日本最大和牛生產地，A4等級以上的，都有非常細緻的霜降雪花，真係燒一燒、滾一滾，神仙都企唔穩。食和牛，最好係呢啲方法。火炙，即係燒。和牛經過火炙，油脂溶化，增添焦香，牛肉嫰滑，油香滿溢，蘸日式串燒醬汁，包你大叫Oishi！還有涮涮鍋，即係ShabuShabu，肥美和牛，放入滾熱鍋湯中涮一涮就食，半熟的肉，特別鮮嫩，一邊吃，一邊聽住湯滾到「Shabu Shabu」咁聲，就係食法名稱嘅來源。仲有另一種，壽喜燒，即係Sukiyaki，仲矜貴，日本人傳統上會喺喜慶時節先食，有專人服侍，好高級。Hana嘅的壽喜燒跟足關西傳統烹調方法，先燒熱個鍋，塗上牛脂，將牛肉煎至七分熟，然後喺煎香嘅牛上撒上砂糖、Sukiyaki醬汁，純米吟釀，最後蘸日本生食食用蛋嚟食，又滑又香，食過難忘。
1939年產自兵庫縣的田尻号，被稱為黑毛和牛的元祖。（網上圖片）
黑毛和牛元祖
咁鬼正嘅和牛，咁鬼講究嘅傳統，你梗係以為和牛歷史好悠久啦。話你知，其實我哋而家食到嘅和牛，只有83年歷史，仲後生過我阿媽。首先講清楚，我哋而家食到嘅和牛，主要分為：黑毛和牛、褐毛和牛、短角和牛、無角和牛四個品種。其中以黑毛和牛最多，佔全日本和牛90%。黑毛和牛種最早出現於1900年，即係明治33年，係雜交品種。因為日本原生的本土牛，體型細小，生長速度又慢，根本唔好食。於是引進原產於瑞士，又名紅花牛的西門塔爾牛種（Simmentaler）、蘇格蘭愛爾夏乳牛（Ayrshire）和褐毛瑞士牛種，加上日本本土牛混種，最後產生黑毛和牛。現在的黑毛和牛，祖先大多是來自日本兵庫縣美方郡香美町小代區貫田的田尻松蔵宅的田尻号。牠是用但馬牛種和以上幾種國外牛雜交出來的，1939年出生，被稱為黑毛和牛的元祖。
涮涮鍋ShabuShabu，像打邊爐，也是超級好味的和牛食法。
又係明治維新
其實在和牛出現前，尤其明治維新以前，日本人是很少吃牛肉的。主要原因是佛教傳入日本，加上神道教都是推崇人們茹素，且認為牛肉是不潔之物，有身份的人都不屑食牛肉。加上日本天皇為保護農耕，於公元675年頒布了「肉食禁止令」，即每年四月至九月間禁食牛馬犬猿雞等，日本人向來聽天皇話，加上海產豐富，根本不需吃肉。及至明治維新開始，一切改變。明治政府把肉食視作改良日本人體質及文明開化的一個重要手段，因此積極在社會上推行吃肉強身，甚至天皇本人也帶頭吃牛肉。加上有日本近代教育之父的福澤諭吉在報紙上推波助瀾，發表「肉食之說」與「必須吃肉」兩篇社論文章，食牛肉立刻成為新的社會風尚。1879年日本人就吃掉了3萬多頭牛，食牛文化如野火蔓延，一發不可收拾。計一計數，由1868年明治維新開始，日本人正式吃牛的歷史至今才不過154年。由1939年黑毛和牛的元祖田尻号誕生至今才不過83年，和牛已成為今天讓全世界人流晒口水的美食，真係不得不佩服日本人做事精益求精的精神。
Hana華小料理屋
地址：銅鑼灣登龍街1-29號金朝陽二期地下C舖
電話：2895 5677
