經典美食｜銀針粉即係狗仔粉？點解又同老鼠有關？
舊時上茶樓，有冇見過呢個情景？
點心阿姐推住點心車，遠遠傳嚟呢種叫賣聲：「好靚銀針粉……好靚鮮蝦銀針粉……」
人隨聲望，只見一個個半圓玻璃罩，蓋在碟上，十足太空人的頭盔，讓小朋友充滿幻想。玻璃罩內，擠滿密麻麻的炒粉，兩頭尖，中間肥，像沙甸魚般逼到實，伴着黃色的雞蛋絲、紅色的蘿蔔絲、綠色的葱絲，還有肉色的鮮蝦，五彩繽紛，構成童年美味的回憶。
銀針粉可以放湯可以炒，炒的可加蛋絲、叉燒絲、蝦仁等，十分香口。
鮮蝦銀針粉
央求老竇，截住阿姐，叫來吃，阿姐小心將玻璃罩揭開，粉條已被壓成堅實半圓，絲毫不變，用匙羮挖一片到碗中，舀一匙來吃，炒過的粉條，煙韌彈糯，帶鑊氣香，夾着蛋絲的香、蝦仁的鮮、蘿蔔和青葱的甜，吃得人滿咀香馥，耳仔都郁埋。如果你，都有以上的回憶，那閣下的年紀，一定有番咁上下。皆因鮮蝦銀針粉，近年已絕跡茶樓，想找她的身影，只有到某些老字號街坊粉麵廠，買一斤半斤回家自己炒，方能解相思之苦。
兩頭尖，中間肥，你話似針定似老鼠。
唔係狗仔粉
或許你會話：「近年唔係開番好多狗仔粉舖頭咩？狗仔粉咪即係銀針粉囉！」
如果你咁講，就證明少年你太年輕了。狗仔粉，豈是銀針粉？起源、材料、做法和味道，全部皆不相同。狗仔粉出現於戰後香港街頭，那時百廢待興，滿街窮人，志願機構派發麵粉予以救濟，人們溝入粘米粉，以熱水沖開，隨手搓成兩頭尖的粉條，放入湯水煮熟來吃，腍劈劈，勁嗦湯。由於麵粉乃救濟之用，故稱之為救濟粉。又由於「救濟」與「狗仔」諧音，加上搓出來的粉條，像極狗仔尾巴，慢慢狗仔粉之名，不踁而走，跑贏救濟粉，成為主流。更有些人下點菜脯，加少少豬油渣，沿街叫賣，狗仔粉乃一躍成為庶民廉價美食。
台灣及福建人，叫佢做米苔目，盛產稻米的台東，也是米苔目重鎮。
傳統客家味
至於銀針粉，其實是客家傳統食物。源於廣東梅州大埔一帶，該地客籍農民，每遇穀物豐收，便將餘米磨成米漿，蒸熟做粉糰，再用通窿器皿壓出一條條頭尾尖、中間粗身的麵條，吃來煙韌爽彈、米香濃盛，無論炒香或湯煮，同樣美味。放湯會下冬菇、蝦米、肉絲等。炒則以肉絲、蛋絲、菇絲配襯，十分可口。這傳統食物，隨着客家人飄洋過海，四處生根。福建、香港、新加坡、馬來西亞、台灣等地都見到她的蹤影，不同地方，又有不同名字。香港叫做銀針粉，取其形狀像針。星馬則稱老鼠粉，也是因為兩頭尖、中間肥，像老鼠的形狀而得名。台灣和福建，則喚作米苔目或米篩目，產米聞名的台東，也成了米苔目重鎮。無論名字怎改，銀針粉一樣受歡迎，且已融入回憶，成為經典美味了。
