最營甜品｜喳咋唔同摩摩喳喳？原來係葡兵軍糧？點解又叫阿婆粥？
有一種糖水，被稱為最有營養糖水。
因為佢嘅材料，以豆為主。一大把豆，倒晒落去煲。
紅豆、綠豆、腰豆，鷹嘴豆，眉豆，赤小豆，扁豆……通常四五款左右，家家都有自己配方。再加芋頭、西米、黑糯米等等，落糖煲到杰撻撻，舀起落花奶落椰漿，就係坊間最有營養嘅甜品嘞。因為豆類除了含有豐富蛋白質，仲有高水溶性纖維，有助降低膽固醇，平衡血糖，保持腸道健康。呢款甜品，大名：喳咋。個名咁怪嘅？查實佢係鬼佬嘢囉。
豆呀！全部都係豆呀！喳咋就係全部都係豆囉。
廟街食喳咋
香港地，人人都食過喳咋啦。老一軰嘅人，都會記得呢一幕。入夜，約三五知己，去佐敦睇戲。睇完戲，行廟街，即係平民大笪地。由廟街南逛到廟街北，有人賣藝、有人賣藥、有人賣衫，睇飽逛完，意猶未盡，最後嘅節目，就係食糖水。食乜好？一場嚟到廟街，梗係食喳咋啦。當年廟街，所謂有「一雞一鵞」，雄霸街頭街尾。雞，即係雞記麻雀。原是一間士多，後靠出租麻雀賺錢，最後妺仔大過主人婆，索性全力攻打四方城，成為全港首間持有牌照的麻雀館，十分巴閉。鵞呢，咪係鵞記渣咋囉。鵞字由「我鳥」打棟寫，十分有個性。伯爺嗰代就由澳門做起，嚟到香江，開枝散葉，最初只係賣喳咋糖水嘅木頭車檔，常在雞記門口擺賣，輾轉入舖，愈做愈大，至今寶號已近百年，傳至第三代。喳咋好足料，有紅豆、綠豆、紅腰豆、木薯、黃薯及西米，最後加椰漿同花奶，稠杰飽肚，據說係澳門傳統做法。
澳門泉記喳咋，歷史悠久，幾代人都係食佢架。（網上圖片）
源於葡國兵
喳咋唔係本地嘢，呢個肯定。
舊時過大海，已經見到周街都賣喳咋。好似澳門新橋，即係三盞燈、白鴿巢，就有喳咋泉主理嘅泉記喳咋，大大話話有六七十年歷史。其實喳咋真係源起於澳門，因為喳咋呢個名，本來叫「雜雜」，傳說係葡萄牙語「雜糧」的音譯。葡人的雜糧，據說係嚟自以前駐守喺澳門兵房嘅葡國士兵，佢哋將各式各樣嘅豆煮成一大煲糖水做午餐，食完可以飽肚。後來呢種午餐，流傳到軍營以外，有阿婆照辦煮碗，煮一大煲踎喺街邊擺賣，所以喳咋又叫阿婆粥。
之後慢慢演變，又加芋頭又加西米又加黑糯米，又落埋椰漿同淡奶，從此更成為澳門人所共知嘅糖水。可能由於又落豆又落椰漿，個名又好鬼似，好多人慢慢將佢同馬來西亞嘅甜品「摩摩喳喳」撈亂。摩摩喳喳（Bubur Chacha），主要係用亞達枳、西米、粟米等做材料，加入芋頭、番薯、紅毛丹、龍宮果、波羅蜜等南洋水果，最後加椰漿及花奶而成，可以熱食，亦可以加冰凍食，同喳咋係兩回事，其實冇親戚關係架。
超市都可以買到即食版，喳咋已經深入民心了。
