【英國置業】買新樓 呢幾樣最值得花錢 Upgrade
上次講到在英國買新樓，今次同大家講下錢，究竟有咩錢要俾？上文已經提及在不同時段先俾 100 鎊之後再俾 400 鎊共 500 鎊訂金就可以 hold 一個地段，呢 500 鎊連同之後的 10% 大訂都會在最後找尾數時扣取，唔稱得上是額外使費，今次就同大家分享下英國買樓大致仲有咩使費。
1. 律師費
分為律師樓收取幫你做嘢的費用 (Legal Fee) 和各樣文件、search fee 等費用。Legal Fee 因律師樓而異，一般由 600 鎊至 2000 鎊不等，我哋用發展商律師，費用由發展商支付，面數慳咗 1250 鎊。其他 search fee、文件費約 300 至 500 鎊。
2. 政府費用
呢條大數主要係印花稅。除非你在世界各地從來都無買過樓，否則在英國都不能享受 First time buyer 唔使俾 stamp duty 個優惠 (夫婦二人同體，邊個買過都不符合資格)，stamp duty 俾幾多視乎樓價，同埋當時仲有無持有其他物業，可以用呢個 stamp duty calculator 幫手計算︰https://www.stampdutycalculator.org.uk/
除此，亦要俾 HMLR fee 約 330 鎊作英國土地註冊。
英國買屋，好多時售樓書已經講咗間屋會包啲咩，好似 radiator 暖氣、地毯地板、廚房廚櫃、焗爐、爐頭、抽油煙機、洗碗碟機、basic 燈飾邊啲包，以上好多時都有機會可以 free upgrade，至於雪櫃、洗衣機、衣櫃等則視乎發展商了。
個人覺得，以下幾項，如果發展商無包，值得花錢 upgrade。
地板︰房、樓梯都仲可以接受地毯，但廳我還是愛鋪地板，清潔方便得多。近年好流行的 laminated floor 價錢經濟，已經廣為使用。
地磚︰廚房、所有廁所的地下我會選地磚，因為常常濕水，相信比 laminated floor 更耐用。英國屋廁所一般係無去水位，所以拖地都只可以抹乾。
牆磚︰廁所一般都係磚牆與板牆的組合，一般預設的 standard tiling，只係把磚鋪到去有機會濕水的地方，如洗水盤附近一格仔，廁所馬桶後面一幅。高一 grade 係鋪 half tiling，即係半幅牆鋪磚，沖涼浴室我覺得鋪 full tiling 一啲都唔過份，因為長期有濕氣有機會令板牆發霉，到時就煩了。
浴室花灑︰一般新屋一間係 shower bathroom，一間係置有浴缸的 bathroom，而浴缸上面係不一定會裝花灑的！試問水費貴，又點會日日浸浴呢？無花灑等如叫你唔好用來沖涼。
防濺擋板 (splashback)︰指的是廚房洗手盤和煮食爐對住的一幅牆都鋪上防水物料，又係為清潔方便，唔怕油、水彈到一牆都係。
洗乾衣機︰就算包洗衣機，一般都要 upgrade 才附設乾衣功能，在濕凍的冬天尤其重要。
屋外電掣︰方便使用剪草機於花園剪草，如果唔係就要有個超長拖板了。
其他仲有好多大大小小東西可以加錢 upgrade，好似天花射燈、alarm、屋內大小插頭加多、built in 衣櫃等等，豐儉尤人。英國近年勁推電動車，因此新屋大多每家有自己的汽車充電，電能家居亦係大勢，最後，加大埋屋企個電壓也理所當然。
