【英國置業】俾 100 鎊 deposit 做準屋主！英國買屋究竟買新定舊好？
來英一年了，剛完成另一件大事，就係在英國買樓，係買屋至啱。是的，在英國，租屋租幾十年的大有人在，只是眼見租金上揚，又怕被業主踢走，加埋本身係極度唔鍾意搬屋 pack and unpack 的人，因此，半年多前已開始周圍睇屋。決定買屋，問題便來了，究竟買新屋 (new built) 定舊屋好呢？我不是買樓專家，只能分享少少自己的經驗、考慮同睇法，始終新與舊各有所好，沒有對錯，只係大家的需要不同。
以同一屋型來說 (即係以 detached 比 detached)，舊屋好處係一般來說空間較大，好多甚至有兩個 living room，樓底高，有唔少已經做擴建，好似起多個 conservatory，整多間 summer house，添置埋 garden shed，這些「增值建設」隨屋送上，方便不少。舊屋唔同年代展現出不同建築風格與美學，間間不盡相同，比起新樓幾乎一式一樣，舊樓無疑是有自家風格得多，我的英國朋友就表示只鍾情舊樓。
至於唔好處，唔少英國樓真心舊，要知英國屋閒閒地樓齡 50 年以上，舊建築就算當年用料幾好都會折舊。唔少租過有咁上下樓齡屋的朋友都表示，間屋保暖唔得，就算關晒窗開晒 radiator，冬天仲係覺得好寒。買舊屋預咗要做一個詳細的 surveyor report，睇下間屋有咩潛在問題，很可能要花一大筆換個硬件，再加埋順便鋪下新地板、換下廚櫃，就算 B & Q 有得買料 DIY 都要用上時間金錢，更莫說搵人來裝修了。
如果好好彩業主已經執到間屋新淨靚仔，buyer 就要有心理準備要同人爭同人bid，就算業主接受你開價，仲要睇下間屋有無 chain，即是說假設業主買唔到樓搬，間屋分分鐘賣唔成。難怪成日聽人講，搞咗幾個月半年，最終都係買唔成得個吉。
新屋好處簡單講就係填補舊屋的缺點。New built 新屋好多時在興建中仲係地盤時已由發展商開售，即係香港叫法「買樓花」，屋型、幾多房、有無車房，價錢明碼實價列出，只要你付上 deposit 留一個 plot (地段)，基本上就預留咗間屋俾你，唔再需要 bid 高個價。而最吸引的是 deposit 只係 100 英鎊！無錯，只係約 $1000 港幣就可以 hold 一間屋！到入伙前半年左右，再俾多 400 鎊，10% 大訂差唔多到收樓前 4 個月才支付，最後尾數係交樓前 2 星期左右收取，可以說未付大訂前買家隨時撻訂都唔肉痛。除非最後俾唔到尾數/ 做唔到按歇令交易取消，否則唔再需要同人爭。
New built 新屋自然美輪美煥，而且包 10 年保養，頭兩年由發展商負責，因此買家一般都未必會做 surveyor report，心態好明顯係住落有問題咪叫發展商整囉。新屋用嘅物料一般都符合現代標準，保溫效果較好，而且能源效益指數佳，在電煤價格差不多 double up 的今天尤其重要。不過，要留意係新屋的發展商一般售價只包售樓書上列明項目，因此地毯地板、廚房電器、廚廁磚牆磚地、電掣插頭好可能樣樣計錢。有人會覺得好唔 secure，驚價錢無限增加 out budget，不過，有唔少發展商其實都會主動 free upgrade 部分項目，不妨在落訂前探聽一下 sales manager 口風，大概有個 idea 哪些重要項目需要加錢。至於 free upgrade 多定少，真正因發展商而異，據我所知，第一批最早認購的買家往往得到最多 free upgrade，這個也是明白的。一般新屋廚櫃款式屋內間隔都如樣版屋，可以揀的可能只係物料和顏色，個人特色相對就無咁大。而我地，由於怕煩，亦自問沒有設計天份，加埋遇上一個價格相宜而又鄰近學校的新盤，因此二話不說就選擇了這個樓花新屋苑，下次再跟大家分享買新屋費用同注意事項。
