【生活】英國版10蚊店Poundland 必買攻略+必逛Superstore
去親日韓，當地10蚊店真係可以逛完再逛，香港10蚊店都唔錯，有好多實用小物，來到英國，呢邊都有10蚊店 Poundland (同埋拆夥出來的 OneBelow)，分店多如超市，雖然無香港日韓十蚊店咁多精緻小品，但入去兜一轉仲有收獲。
叫得做Poundland，基本上貨品價錢大部分定價在1鎊，當然如香港般，亦有部分貨品定價1鎊以上，種類既有家居小擺設、咕𠱸、玩具、圖書、文具、DIY 手作，亦有衫褲鞋襪，但我覺得最抵買的是一系列成藥、清潔用品、廚房用品同手機用品。一般必理痛、感冒熱飲、消炎藥、喉糖、鼻塞傷風藥，甚至維他命C都只售 1 鎊，貴藥基本上也不多於5鎊，當然要講到專，買藥還是要去藥房。
清潔用品亦是我必入之選，呢隻只賣 1 鎊的 The PINK stuff 有一系列清潔用品，特別針對頑固污漬，真係好正。沖涼企缸用耐咗，常生橙色的銹漬 (應該是同英國水質有關)，我會用來清潔，對付磁磚邊亦一流。家中常備的潔廁用品、漂白水亦賣得便宜。
行香港十蚊店，廚房小gadget可以買唔停，呢邊花款唔算多，亦無日本人咁多聰明設計，但大部分都針對本地人需要而推出，好似 toaster bag，方便你搽晒醬或者整芝士多士都唔怕整污糟toaster，最正係每個可以用上50次，夠晒環保。Slow cooker liner、roasting bag都係方便你煮食時唔會整到好messy，方便清洗。隔熱板、隔熱手套、整蛋糕的焗盤小gadget、瓦盤，全部都是價廉物美之選。
來英前特登買咗好多電話貼同叉電線，因為擔心呢邊貴，點知俾我在 Poundland 見到 1 鎊「三叔」、iphone XS 等電話貼 (不過就無最新款)，加埋長叉線短叉線都係 1 鎊，梗係要買定長備家中。
不過講到好行，必推位於不同 Retail Park 內的 Poundland superstore，size 係市中心的一倍，貨品款式更多，除了同樣有服裝部，亦有更多園藝用品、電子用品、大型卡通、電影衍生的玩具 (Harry Potter、Toy Story、Peppa Pig)，天氣開始回暖，已見有充氣小水池上場，當然價錢就不是 1 鎊了。這些 Superstore 勝在貨品種類更多，一家前來既買日用品，亦入手玩具 gadget，細路開心，大人荷包都唔會太傷。
