【小說】灑滿落英的街角（八）｜大老闆的兒子

何嘉麗

嘉嘉，正職旅行嘉，副業打工仔。

2022-05-31 08:00

生活專欄

內容

前文提要：若蘭與一同坐鎮接待處的Annie，合作愉快。Annie為她提供很多寫字樓的八卦，而最新一段消息就是他們老闆的兒子又有新女朋友了。

若蘭接過Annie遞來的娛樂版，望向她手指用力地點着的那幅照片，差點笑了出來：「就憑呢個背影，你就肯定佢係老闆個仔！」

「一定係啦，我哋個個都覺得係佢。報紙都咁寫！」

「個個都覺得？你哋見過佢咩？」

「見過，成日見，佢公司喺頂樓！」

若蘭忽然覺得自己上班已經有一段日子，但是好像連大老闆也未見過，更何況大老闆的兒子！還是名人！當她把這個消息告訴 Helen 時， Helen 笑到前仰後翻！

「你住得背唔背啲呀？你老闆個仔係名人嚟㗎喎！你真係唔識佢咩？」

若蘭心想，自己做了湊仔婆20年，即使小朋友長大後去外國升學、生活，她也很少理外面發生的事。反正，她的最大興趣，就是繡花！

「你一日到黑閂埋門繡花就得啦！做乜要出嚟做接待員？你一幅繡花都賣唔少錢！」

「又係你話要出去見下世面，而家你又叫我留喺屋企繡花！我唔想再俾你叫我做自閉兒童呀嘛！人哋自閉兒童好聰明好有天份，邊有我咁蠢！」

Helen 忽然很溫柔的望着若蘭說：「同你玩之嘛。自己一個人匿埋喺屋企繡花，對眼唔盲個心都盲！日日唔係食蒸魚就係食蒸魚，食飽喺度等仔女打電話過嚟啊，一個禮拜都等唔到一次，聽起來也戥你寂寞！而家打下工，識多啲人，知道多啲事，八八卦卦有時都係一種情趣！最緊要有返個節奏，仲有糧出，幾好！唔同你講啦，我走先，約咗個客，轉頭 e-mail 你老闆個仔嘅資料俾你！」

臨放工時，若蘭收到Helen的電郵，一開就跳出一幅男士的相片，旁邊 Helen 寫着：「你老闆個仔！」