【飲食】快餐文化｜魚柳包早過漢堡包出現？漢堡包係美國定德國人發明？
阿媽呀！呢條題搞到我好亂呀！
乜漢堡包唔係美國國食嚟咩？點解殺出個德國人嘅？魚柳包明明唔夠漢堡包咁受歡迎，點解又會話佢仲早過漢堡包出現？咁到底漢堡包嘅發源地係邊度呀？魚柳包又係邊個發明㗎？
漢堡包夾着肉菜醬汁，單手搞掂，快靚夾正，係現代速食代表。
魚柳包嚟自漢堡？
好多人都以為，漢堡包係快餐文化代表，而美國係快餐文化最大國，咁漢堡包一定係由美國人發明啦！加上大部分人，最先接觸漢堡包，都係喺嚟自美國嘅大型連鎖快餐店，所以咪產生呢個錯覺囉。
漢堡包，英文Hamburger，顧名思義，即是：來自漢堡嘅包。漢堡，咪就係德國第二大城市囉。漢堡近海，係個漁港，1703年就開始有魚市場集散魚獲，漁民喺早市賣魚，為求方便充飢，就咁用兩塊麵包夾住醃漬魚柳嚟食，連炸都冇炸過，據說呢種腥到死嘅魚柳包，就係最早期嘅魚柳包。
漢堡漁市場，逢周日有早市，魚柳包賣足幾百年。
漢堡包嚟自美國？
到咗十九世紀，漢堡人除咗會食魚柳包，仲識得絞碎牛肉做成牛肉餅，由於呢種做法，係漢堡人發明，所以稱為漢堡扒。呢種漢堡扒，既便宜又美味，慢慢成為德國人嘅國食，地位同香腸差唔多。20世紀初，德國移民前往新大陸，呢啲移民，將家鄉漢堡扒一併傳到美洲，漢堡扒於是開始喺美國落地生根。冇錯，漢堡人發明嘅係漢堡扒，至於漢堡包，就係另一啲人嘅創作。
1901年，丹麥移民路易斯·拉森峰喺康乃狄克州紐黑文市嘅路易斯餐廳，推出用兩片白麵包夾着洋葱、番茄、芝士嘅免治牛肉饀包，自稱係歷史上第一個漢堡包，不過橫睇掂睇，呢款包似三文治多過漢堡包。
薯條加漢堡包，係世界人類共同嘅美食記憶。
漢堡包屬於世界？
後來，佢嘅生意對手，都紛紛聲稱自己至係原創，爭拗一直不絕，好難確定誰是始作俑者，但可以肯定嘅係，呢種用麵包夾住牛肉餅嘅漢堡包，喺1904年嘅聖路易斯斯博覽會後開始爆紅。根據當時《紐約論壇》嘅報道，稱呢款夾住漢堡扒嘅包為：路邊小販嘅創作。讚嘆呢種新食法令人眼前一亮，報道亦令漢堡包紅遍整個美國，亦由美國一直傳播到世界各地。一百年後，世界各地都有漢堡包，款式五花八門，牛肉、豬肉、羊肉、雞肉全都可以成為漢堡。甚至用大蘑菇、素菜代替肉類，變成健康潮流。
至於魚柳包，要去到1962年至大紅大紫，美國俄亥俄州辛辛那提市嘅麥當勞特許經營人盧·格倫，發明用炸魚柳做饀嘅魚柳包，1963年正式登上麥當勞常設餐單，並於1965年喺全美推廣。魚柳包呢位大哥終於吐氣揚眉，成為世界知名嘅快餐食物。
五花腩都可以做漢堡，仲要係迷你版本。
