【飲食】港式奶茶源於英國人 咁英國奶茶源於邊度？
要數香港代表性食物，奶茶肯定走唔甩。濃郁嘅紅茶，撞入香滑嘅花奶，加少少砂糖，混調出一種又甜又滑嘅地道本土滋味。由於師傅用棉布茶袋來拉茶，棉袋沾染茶色，成對女人絲襪咁，所以又叫絲襪奶茶。呢杯滑滑絲襪奶茶到底源起邊度？當中又有咩古仔呢？
一杯醇滑絲襪奶茶，係好多香港人每日嘅精神食糧。
又關大航海時代事？
眾所周知，中國人一向只飲唐茶。即係普洱、壽眉、鐵觀音呢啲。港式絲襪奶茶，用紅茶嚟做膽，一睇就知唔係中國嘢啦。冇錯，我們現今飲嘅港式奶茶，係受殖民時代英國人影響嘅。話說十七世紀初，西方大航海時代，荷蘭同英國挾住船堅炮利東來貿易，佢哋分別成立咗荷屬東印度公司同英屬東印度公司，將亞洲一帶物資運返本土，茶葉就係其中一樣珍品。
香港人嘅三點三，就係蛋撻配奶茶。
又關殖民地事？
英國人更加喺印度廣設茶園，種植紅茶。紅茶運回英國本土，旋即風靡英國皇室貴族。佢哋對嘆茶趨之若鶩，玩得好骨子，純銀茶壺、骨瓷杯碟，加奶加糖，發展出一套精緻下午茶文化。慢慢呢種風尚流入民間，午後公餘，一杯奶茶，一件小餅，成為國民習慣。十九世紀中，香港開埠，上流社會嘅英國人，帶嚟下午茶文化，慢慢連庶民大眾也愛上。下午三點三，總要唞一唞，到茶檔、到冰室，喝一杯濃咧香滑奶茶，慢慢累積成為今日奶茶文化。
泰式凍奶茶，色澤較深，調味較甜。
又關文明古國事？
不過，論到功勞，英國人最多將奶茶發揚光大，但係要追本溯源，邊個至係最先發明將奶同奶溝埋嚟飲呢回事嘅呢？其實喜馬拉雅山地域一帶如印度、不丹、尼泊爾等國家，以及西藏、內蒙古地區嘅人自古都識飲奶茶。不過呢堆國家地區當中，卻以印度為出產茶葉最多嘅國家，加上佢係文明古國，文化較周邊國家高，小國自然容易受佢影響，因此唔少人認為，印度先至係奶茶嘅發源地。
印度拉茶，可能就係奶茶嘅老祖宗。
又關創意無限事？
而印度奶茶文化，不單受周邊國家模仿，連中東阿拉伯國家，甚至非洲埃及、摩洛哥等國家，都受到印度文化影響，發展出加入香料、蜜糖、酥油或奶油混合嘅特色奶茶。至於英國同荷蘭呢兩個國家，就將奶茶文化先後傳到殖民地，如緬甸、馬來西亞、印尼、台灣等地，都有自家一套奶茶傳統。呢啲國家又再影響到周邊國家，好似泰國咁，即使未嘗被殖民，都一直有自己嘅奶茶文化。而奶茶文化，到今日仍在發展。好似台灣人將薯粉做嘅珍珠加入奶茶入面，變成紅遍全世界嘅bubble tea。香港除咗絲襪奶茶，又有人加入涼粉，甚至同紅豆冰cross over，變成涼粉奶茶及奶茶紅豆冰，真係創意無限。
加咗涼粉嘅奶茶，你鍾意飲嗎？
