【飲食】爵士湯源於邊位爵士？起源竟然同報恩有關？
愛好飲食嘅香港人，都會聽過呢個名。爵士湯，以蜜瓜、響螺頭、老雞、雞腳、花膠、沙參、玉竹等材料，煲足三小時，響螺鮮美、花膠軟滑、瓜肉清甜，是滿滿骨膠源嘅滋補靚湯。
明閣嘅爵士湯，用咗哈密瓜嚟煲，湯頭滋潤清甜。
源於邵逸夫？
呢道爵士湯，今日各大酒家都會製作。像旺角康得思酒店星級中菜廳明閣，就提供呢款靚靚爵士湯，一樣落足花膠、響螺頭嚟煲，仲落埋哈密瓜，飲起嚟超級滋潤，味道十分香甜。其實呢個湯，叫得呢個名，估都估到一定同某位爵士有關啦。咁你又知唔知道呢款湯到底係邊一位爵士嘅愛湯呢？儘管爵士湯流行至今不過四五十年，但坊間流傳嘅起源，都有最少三個版本。第一個版本，係話爵士湯，其實係源於邵逸夫爵士。呢個講法，係嚟自一啲邵氏資深員工，佢哋透露，邵爵士能夠享壽107歲，其中一個秘訣，就係日日飲靚湯。佢用海螺頭、唐排、老雞、豬腿肉、瑤柱、淮山、南杏等材料，唔落花膠落牛筋，唔用蜜瓜用哈密瓜，熬足六個鐘，唔要湯渣，淨係飲湯。肉味鮮甜，超級滋補，後來坊間就叫呢款螺頭哈密瓜牛筋湯做爵士湯。
邵逸夫爵士享壽107歲，聞說長命秘訣之一就係飲湯。
鄧肇堅愛湯？
不過呢個講法，當然有人異議，坊間流傳最廣嘅說法，係爵士湯源於另一位爵士：鄧肇堅爵士。佢係上世紀香港企業家及慈善家，以生活儉樸、熱心公益及慷慨捐款著稱，好多學校、醫院、建築物都用佢個名嚟命名。咁個湯同佢點解會有關係？
據說上世紀八十年代，鄧肇堅爵士經常到上環西苑酒家幫襯，佢鍾意飲自己材料煲嘅湯，就命人提前送煲湯材料去酒家，響螺、老雞、雞腳、花膠、沙參、玉竹……仲落埋蜜瓜，叫西苑大廚代熬。熬足幾個鐘，到佢夜晚嚟到飲，湯甜清潤，滋陰補氣，個個都讚鄧爵士識食又識補。由於呢個係鄧爵士私房湯，老闆徵得爵士同意，將呢個湯放上菜單，並命名為爵士湯，以記念係鄧爵士所創所愛，後來客人飲過，口碑傳千里，成為城中名湯。
西苑酒家版本嘅爵士湯，係用蜜瓜嚟煲，較哈密瓜清新。
記念救人命？
爵士湯因鄧肇堅爵士而起，原來坊間仲有一個版本。話說曾為富豪鄭裕彤開設嘅富萬年酒樓做總廚嘅黎汝森，先後招呼過不少名人。佢話1979年佢喺澳門賽馬車協會工作嘅時候，鄧肇堅爵士就經常嚟食飯。話說有次，黎汝森有個夥計身體唔舒服，鄧肇堅見狀，認為事態不妙，即時打電話命人用車將夥計送到鄧肇堅醫院檢查，最後診斷夥計患上肺結核，幸好及時發現，最終救回夥計一命。黎汝森為答謝鄧肇堅爵士，知道爵士鍾意飲湯，就用響螺、肉排、哈密瓜、圓肉、紅棗、陳皮等煲湯，煲足三個鐘頭。湯味鮮美、瓜甜螺香、藥味濃甜，由於材料都煲到透，連鄧爵士本來牙齒欠佳，都可以食到湯渣，深得爵士喜愛。呢個湯，最後就稱為爵士湯，除咗爵士愛飲，亦記念佢救咗個夥計一命嘅事蹟。至於三個版本，你信邊個，就只好由你話事，我負責講故仔同飲湯嘅啫。
鄧肇堅爵士宅心仁厚，係上世紀大慈善家。
