【飲食】震驚！刺身非日本人發明？蘇軾食到有眼疾？曹植 李白 杜甫都係粉絲
今晚食乜嘢？不如食日本嘢啦。好呀！我最鍾意食日本刺身，三文魚、吞拿魚、油甘魚……仲有海膽、甜蝦、帆立貝，統統我都要食。得得得，冇問題，不過企定先，聽清楚，以下介紹嘅刺身起源故事，聽完我驚你會崩潰呀！
日本刺身，矜貴又好食，係香港人嘅頭號至愛。
刺身其實點解？
刺身，日本語係さしみ，音讀出嚟係Sashimi，呢個人人都識啦。刺身其實係日本人對切片生肉嘅稱呼，唔單止係魚肉，牛肉、馬肉都可以做刺身。刺身一詞，其實始於日本室町時代，「刺」嘅意思係切成薄片，「身」嘅意思就係「肉」，所以刺身就係切成薄片嘅肉。不過亦有人講，「刺身」其實係一種識別方法，因為日本人劏魚去皮後，難以辨別係乜嘢魚，所以用竹籤將細細塊魚皮刺喺魚片上以資識別，呢種方法稱為「刺身」。亦有一種講法，係刺身其實係日語「刀」（Tachimi）嘅轉音，因為切魚講究刀章，所以用上乘刀工切出嚟嘅魚生就叫做刺身。
刀章高與低，直接影響刺身的質素。
周朝已經出現魚生
無論起源係乜，日本人的確將刺身做到出神入化，兼且發揚光大，甚至變成國食。但係勁還勁，講到歷史源流，原來魚生呢味嘢，又係嚟自我哋偉大嘅中國。係呀！中國人，一早就食魚生。魚生，我哋稱為「膾」，又作「鱠」。膾字最初嘅意思，係指切細嘅生肉。《漢書·東方朔傳》就有記載：「生肉為膾。」《禮記·內則》都有寫：「肉腥細者為膾。」咁到底中國人幾時開始食膾？原來最早可以追溯到周朝，產於周宣王五年嘅出土青銅器「兮甲盤」就有銘文記載，當年周師於彭衙迎擊獫狁打勝仗，大將尹吉甫私宴張仲及其他友人，主菜就係燒水魚加生鯉魚片。《詩經·小雅·六月》都記載咗呢件事：「飲御諸友，炰鱉膾鯉」，「膾鯉」就係生鯉魚生囉。後來孔子成日講嘅：「膾炙人口」、「膾不厭細」，個膾字就係指魚生。
薄切嘅魚生，品嘗到魚嘅鮮美，係最上等嘅料理。
曹植李白杜甫都食
不過古代中國人食魚生，同現代日本人唔同。中國人愛以淡水魚做魚生。鱸魚、鯽魚、鯉魚呢啲都係上品。七步成詩嘅曹植，就係魚生粉絲。佢喺《名都篇》入面話：「膾鯉臇胎蝦」，即係話食鯉魚魚生要蘸小蝦醬先至正！真係奄尖。食魚生嘅風氣，一直去到唐代，仍然處於高峰。詩仙李白，就多次喺詩中提及食魚生嘅奧妙：「雙鰓呀呷鰭鬣張，蹳剌銀盤欲飛去。呼兒拂几霜刃揮，紅肌花落白雪霏。為君下箸一餐飽，醉著金鞍上馬歸。」佢嘅同行詩聖杜甫都唔執輸，都寫咗：「鮮鯽銀絲膾，相芹碧澗羹」嚟詠嘆自己食鯽魚魚生嘅樂趣。其他好似白居易、司馬光、歐陽修呢啲大文豪，個個都有為魚生賦詩，可見都係粉絲一班。
大文豪蘇軾，係魚生頭號粉絲，食到眼盲都要食。
蘇軾係超級粉絲
不過講到頭號粉絲，各大文豪都比唔上宋朝蘇東坡。佢係吃貨人人皆知，不過佢係魚生超級頭號大粉絲，大家就未必知道。蘇東坡寫過關於魚生嘅詩詞，現存有十三首，好似《將之湖州戲贈莘老》中，就有一句：「吳兒膾縷薄欲飛」，就係指湖州嘅魚生切得夠薄夠靚。不過，蘇東坡食嘅係淡水魚，而淡水魚其實好多寄生蟲，生食係非常危險，奈何當時嘅醫學水平，並未發展到顯微鏡呢樣嘢，喺唔知情嘅情況下，蘇東坡因為狂食魚生食到患上眼疾。本來呢個病，係唔可以再食魚生嘅，但身為吃貨嘅蘇軾，又點會咁易妥協？佢仲寫文話：「餘患赤目，或言不可食膾。餘欲聽之，而口不可，曰：『我與子為口，彼與子為眼，彼何厚，我何薄？以彼患而廢我食，不可。』，意思即係：「食魚生對唔住我對眼，但唔食魚生又對唔住我個嘴，咁我點可以厚此薄彼呢？」你話一個人為食到咁，真係有乜解究呢。不過大家唔使驚，而家日本人食嘅魚生，大部分都係海魚，絕少用淡水魚，而且超級講究衛生，食魚生不單唔使再擔心食到眼盲，仲係一種高級貴價享受。先生小姐，今晚食乜嘢？不如食刺身吖！
