【飲食】壽司源自東南亞？曾經係戰亂走難嘅食品？
上回講咗刺身嘅故事，今次不如加多嚿飯，講壽司啦。壽司係日本代表性食物，食壽司，係人都知要去日本餐廳啦。殊不知，壽司同刺身一樣，原來唔係起源於日本，咁究竟今次係咪又關中國事？定係同其他國家有關。
呢個飯和魚嘅組合，竟然唔係源自日本，真係好難接受。
源自東南亞？
講到壽司嘅起源，至今眾説紛紜，只知道，肯定唔關日本事。有人認為，古代東南亞地區，早已有一種被稱為 Narezushi 嘅發酵食品，係居住喺山區嘅人，為咗長期保存魚獲，將魚加鹽再用米飯包住發酵，咁就可以放好耐都仲食得。不過，喺差不多時間，中國其實都有人做緊類似嘅嘢。相傳春秋時期嘅越國，有一種用塊熟麵皮，包住糯米、熟蝦仁、蛋黃、花生、蔬菜等做成嘅圓柱形飯糰，叫做餈飯棒，製作方式，同今日日本嘅握壽司相像，只係材料同形狀唔同，因此被認為係壽司嘅始祖。
最早嘅壽司係用飯包住魚，目的係保存魚獲可以慢慢食。
中國傳日本？
到咗後漢時代，中國開始流傳一種叫做「鮓」嘅食物。《説文·魚部》入面就有記載：「鮓，藏魚也。」，即係用鹽、醋、米及蒸熟或炸脆嘅魚條，同飯糰搓埋一齊，變成一個橄欖形飯波。可以加熱食，亦可以冷食，十分方便。方便到一個點，就係宋朝年間，戰亂頻仍，好多走難嘅人，都會整定呢種飯波作為充飢食品，品種更加唔限於魚，連菜蔬、肉類都可以用嚟入饌，捏製成飯波，走到邊就食到邊。唐朝詩人段成式寫嘅《酉陽雜俎》入面就咁話：「安祿山恩寵莫比，其賜膳品，月有野豬鮓。」，說明原來野豬都可以用嚟做成鮓，壽司原來唔係淨係食魚㗎！
全靠日本人，將壽司變成今日精緻嘅飲食文化。
匠人の精神
至於日本，要到公元700年，即奈良時代至開始從中國傳入了鮓，日本讀音為すし（sushi），即係以鹽醃制嘅鹹魚，後來改為用米飯醃制嘅魚，醃好之後，會一併將魚同飯一啖食，呢個就係現今壽司嘅前身。壽司喺日本，逐漸普及成為日常食品，漁夫會用醋醃過嘅飯搓成飯糰，上面放上海產或肉類，壓成細細一塊，整齊排喺小木箱入面，方便旅途上慢慢嘆。鎌倉幕府時代，壽司更加廣泛流傳，成為日本一種普遍嘅飲食文化。當時嘅壽司，以地域及製作方式，分成兩大派別：江戶派，就係握壽司作代表。關西派，主打係箱壽司。前者全靠壽司師傅手工握捏而成，即係我哋今日喺東京經常見到嘅手握壽司。後者用個木箱將魚和米飯擠壓成壽司，就是今天流行於大阪一帶嘅箱押壽司。無論邊個門派，日本人嗰種精益求精嘅匠人精神，都可以充份喺壽司上體現，呢種精神，唔關邊個發明、邊度源起嘅事了，所謂達者為先，好食先至係 Win 呀！
靚靚三文魚做壽司，係香港人至愛。
