【飲食】冥冥之中！天婦羅傳入日本源於船隻迷航？德川家康因佢而死？
日本名食系列之中，除咗刺身、壽司之外，仲有天婦羅。鮮蝦南瓜野菜等等食材，蘸上炸漿，掉進滾油中炸。嘶咧吵嘞中，炸出外漿薄脆，內裏燙熱新鮮的美食，再睇睇碟上墊底的紙，不沾半點油。嘩！這神乎奇技，就是聞名世界的日本國食天婦羅了。
外漿炸得香脆，內裏 Juicy 嘅天婦羅，係好多人嘅最愛。
本來去澳門
不過，講天婦羅係日本國食，咁又犯咗政治不正確毛病喇。唔係唔係，今次唔係源於中國喇，天婦羅呢味嘢，係百分百由西洋傳入嘅。話說1543年，西方大航海時代，一艘葡萄牙商船正在茫茫大海之中駛向澳門，準備同中國做生意。點知航行途中偏離航向，最終去唔到澳門，而係登上一個小島 ─ 種子島 (Tanegashima)，日本九州南側一個島嶼。
熟悉旅遊嘅人都聽過呢個地方，除咗有陽光海灘同火箭基地外，更係著名嘅「鐵砲傳來事件」，即係西方第一支火砲傳入日本嘅地方。嗰支火砲，其實就係葡萄牙人傳入，其實除咗火砲，亦同時傳入咗天婦羅呢種食物，因為迷航嗰隻船上有三個葡萄牙水手登岸，成為第一批踏上日本國土嘅歐洲人，三個水手留低做生意，佢哋用家鄉手法，將麵糊蘸青豆炸香嚟食，呢道炸青豆，葡文叫做 Peixinhos da Horta，就係日本國土上第一道天婦羅。
大航海時代，葡萄牙嚟到日本，除咗做生意，仲傳入美食。
傳咗入日本
其實呢種用麵糊蘸食材炸嘅手法，早於1543年前就已經存在，佢係葡萄牙人守齋期嘅食物。話說葡萄牙人信奉天主教，每年復活節前六個半星期，就係佢哋嘅大齋期，期間禁食肉，教徒於是將蔬菜蘸麵糊炸嚟食，就係水手整嘅 Peixinhos da Horta 嘞，而 Peixinhos da Horta 字面上嘅意思就係：菜園中嘅魚，其實係齋口唔齋心。呢種食物係為守大齋期而食嘅，而守大齋期嘅拉丁文就係：ad tempora quadragesima，後來日本人就用咗 tempora 呢個名，日文音譯てんぷら，漢字稱作：天麩羅或天婦羅。
去到16世紀，天婦羅經傳教士和商人傳入日本長崎，開始流行起嚟。1669年寫成嘅《食道記》，更出現記載天婦羅製作方法。天婦羅流行到一個點，連戰國時代大名德川家康都係粉絲。傳說德川家康聽聞京都流行天婦羅，吩咐人照做，用芝麻油炸真鯛，搭韭菜一齊食。點知德川家康當時有腸胃病，食咗天婦羅之後，病況惡化，三個月後就去世，唔知佢嘅死，係咪同天婦羅有直接關係呢。
關東派愛海產，關西派愛蔬菜，咁你最愛係乜？
紅到要分派
只知道天婦羅經過日本人改良，逐漸同當初葡萄牙水手嘅做法有出入。食材方面，除咗炸青豆，仲有番薯、地瓜葉、海苔、蓮藕等蔬菜外，甚至將海產入饌，炸蝦、炸魚、炸魷魚、炸貝類等等都有。炸漿亦漸漸多元化，小麥粉、木薯粉都可以做炸漿；除咗用水調和，亦會加入蛋黃、蛋清、醬油、味噌等等嚟增加風味。
慢慢天婦羅仲按地域發展出唔同門派，好似關東派，重海鮮，一般魚貝會完整咁炸，唔切件。麵粉通常會混合蛋汁，用芝麻油低溫炸，需時較長，油脂味和醬油味特別濃厚。而關西派，愛用蔬菜，粉漿用水和麵粉開成，以熱油高溫炸，時間短，所以關西天婦羅顏色同口味較為清淡。無論你鍾意關東定關西，鍾意魚貝定蔬菜，下次食天婦羅時，記得叫炸青豆，因為呢道係天婦羅元祖，食佢就可以講古仔，講下四百幾年前，天婦羅係點樣因為隻船行錯路，而出現喺你面前嘅餐碟上。
便當都有天婦羅，真係睇見都流口水。
