【飲食】又係中國發明！日本拉麵源自廣東鄉里？同明朝遺臣又有關？
關於日本拉麵，香港人豈止耳熟能詳，簡直成精成仙。札幌拉麵、博多拉麵、東京拉麵、熊本拉麵、長崎拉麵……醬油湯底、豬骨湯底、鹽味湯底、味噌湯底、魚介湯底、雞白湯底……直麵條、攣麵條、粗麵條、幼麵條……肥叉燒、瘦叉燒、紫菜、芽菜、筍條、粟米粒、溏心蛋、溫泉蛋……無論乜嘢口味、乜嘢湯底、乜嘢麵條、乜嘢配料，都總有辦法喺香港搵到。香港日本拉麵店也成千上百，梗有一家喺左近。
日本拉麵，肯定係香港人最愛嘅日本食物之一。
日本拉麵雛型
香港人咁鍾意食日本拉麵，可能同日本拉麵嘅淵源有關。關於日本拉麵嘅淵源，目前最少有三種說法。最多人講嘅，就係日本江戶時代，水戶藩藩主德川光圀從明朝遺臣朱舜水帶來的廚師身上，首次嘗到日本拉麵嘅雛型。朱舜水係明朝大學者，自清軍入關，永曆帝流亡緬甸，朱舜水為表忠節，毅然離開中土，遠赴日本，著明朝衣冠，著書講學，終身不履故土。同佢隨行去到日本嘅，除咗家眷，仲有廚師，其中一位來自廣東。有一次，因為要煮嘢俾水戶藩藩主德川光圀食，就喺湯烏冬中加入大蒜、薑等食材，德川光圀食過覺得好味，由於係中國廚師所做，自此之後呢種湯烏冬就被稱為支那麵，成為日後日本拉麵嘅源頭。
Ramen就係漢字「拉麵」嘅音譯，證明又係來自中國。
廣東廚師炮製
另一個說法，都係同廣東人有關。話說1853年美國海軍准將培里率艦隊駛入江戶灣浦賀海面，打開日本鎖國局面後，日本開始向世界各國開放通商。其中橫濱、神戶、長崎等港口，好快就嚟咗一大批中國商人，佢哋除咗做生意，亦將飲食文化引進日本。當中廣東湯麵大受歡迎，廣東廚師喺雞湯中，加入手打麵條同蔥花，被稱之為南京麵，成為日本中國餐館中的一個菜色。1884年函館嘅中華料理洋和軒，就喺宣傳單張入面印有南京麵呢道菜式，係現存最早有關南京麵嘅文字記錄。1890年代後，日本各地都出現主打南京麵或支那麵嘅中華料理，慢慢演變成後來嘅日本拉麵。
日本拉麵口味源自廣東，但麵條就蛻變自山西、陝西嘅製法。
改良遍地開花
第三種講法，係話1910年東京淺草區一家名為來來軒嘅中式餐館，日籍店主尾崎貫一請咗批來自橫濱南京町，即係今日橫濱中華街嘅中國廚師嚟坐鎮。呢班廚師，改良咗橫濱南京麵嘅做法，喺湯底中加入醬油，配料中加咗叉燒、鳴門卷、紫菜、菠菜同筍乾。尾崎貫一稱呢款新做法拉麵為支那麵，由於整個製法及配料等等，同今日嘅東京拉麵幾乎完全相同，所以被稱為現今拉麵的開端。
之後拉麵做法大抵定型，只係傳到日本唔同地方，又發展出唔同嘅風格同口味。好似東京嘅醬油拉麵，就傳承來來軒嘅醬油湯底，成為本州最具代表性口味。去到九州，又發展出用豬骨長期熬煮變成白色濃湯嘅豬骨湯拉麵，係好多香港人嘅至愛。傳到北海道，就分成兩支，函館一支，就專注用鹽做湯底，發展出北海道獨特鹽味拉麵，由於風格較清淡，同其他風味相比，更能突出食材本身嘅味道。另一支，就係札幌嘅味噌拉麵，佢哋使用雞肉或豬肉熬湯底，再加入日本傳統嘅味噌醬調味，味道濃郁，真係一試又難忘。
經過咁多年發展，如今拉麵已經成為日本人心目中嘅國食。
