【飲食】東瀛名物鐵板燒源於成吉思汗？紅遍日本因為一塊廢鐵？
繼續日本飲食系列。刺身、壽司、拉麵、天婦羅都講過，輪都輪到佢喇啩。鐵板燒（teppanyaki），係由兩個字組成。teppan 意即鐵板，yaki 就是燒。客人坐喺鐵板前，廚師企喺鐵板後，即席烤燒，不單色香味俱全，偶然爆個火球，拋接鋼鏟，更加係一場表演。呢種咁獨特嘅飲食文化，尋根究柢，唔係源自日本，而係同當年叱吒歐亞嘅成吉思汗有關。
鐵板上的美食，令香港人趨之若鶩、神魂顛倒。
大汗的食物
講到鐵板燒係成吉思汗發明，呢個未免粗疏咗少少。不過話同佢有關，咁又不太過份。事緣係咁嘅，相傳成吉思汗西征北伐，一次野外棲宿時，見到架喺篝火上嘅肉燻到焦黑唔食得，佢腦筋一轉，攞咗個士兵鐵盔放喺篝火上，然後拔出腰刀，將獵來嘅羊肉片成薄片，貼喺頭盔上面烤，烤成外焦內嫩，仲食到津津有味。士兵見到大汗咁豪邁，照辦煮碗，如法炮製，慢慢呢種食法，竟然大紅於軍中，並稱為「成吉思汗鐵板燒」。後來蒙古大軍西征，呢種食法亦隨軍傳到中亞同歐洲。之後輾轉傳回東南亞及日本，據說日本有名嘅札幌鐵板燒，就係源自中國內蒙古嘅成吉思汗鐵板燒。
到底係咪成吉思汗發明了鐵板燒，至今眾說紛紜。
水手的遊戲
不過呢個講法，西班牙人第一個唔同意。因為芸芸流傳中，有一個講法，係話今日嘅鐵板燒，其實係由西班牙人發明嘅。話説十五．六世紀，大航海時代展開，西班牙航運發達，率先揚帆遠征，到世界各地殖民及貿易。嗰陣時一出海，最少以月計年計，船員鎮日對住個大海，生活枯燥乏味，最大嘅娛樂就係釣魚。不過釣埋咁多魚，都要諗下點食法。西班牙水手就諗到將現釣嘅海鮮，放喺燒熱嘅鐵板上，魚鮮被鐵板灸烤到皮香肉熟，又保留到海鮮嘅汁水，因此深得水手們歡迎。後來呢種煮法，隨着西班牙人傳到美洲大陸，影響咗墨西哥同今日加州一帶嘅飲食文化，之後再經美國人傳到歐洲，開始影響到法國。十九世紀末更傳到日本，影響了後來日式鐵板燒嘅出現。
火球一起，色香味俱來，Good Show！
青年的創意
係嘞，講到日式鐵板燒。據聞係二十世紀初，由一位日裔美國人引進日本嘅。不過亦有講法係，今日嘅日式鐵板燒，其實同日本傳統嘅鋤燒好相似，可能係由鋤燒演變而成。1896年，神戶元町嘅牛肉鋤燒店「月下亭」開幕，店家用一個扁平到似鐵板嘅鍋子嚟燒薄切牛肉，仲混和高麗菜絲同其他食材，頗有現代鐵板燒嘅雛型。呢個雛型，去到1945年，終於演變成今日嘅鐵板燒。嗰時二戰結束，到處都係廢鐵，本來喺神戶做開咖啡店與咖啡豆批發嘅青年藤岡重次，就用造船廠用剩嘅廢鐵做成鐵板，以鐵板代替鋤燒烤食物，開咗間餐廳叫MISONO。佢見當時大量美軍駐紮，索性將鐵板搬到室外，喺鐵板上燒牛扒，結果生意火紅，人人爭相仿傚。呢種食法，更引嚟美國記者採訪，並問藤岡呢種食法叫乜嘢名。藤岡見係用鐵板嚟燒食物，靈機一動，就將佢命名為 teppanyaki，意思即是鐵板燒。如今，「Teppanyaki」已被收錄喺英文辭典入面，成為日本重要飲食文化之一。
時至今日，鐵板燒已經係世界美食，人人都喜歡。
