【飲食】日本炭燒咖啡本來係畀窮人飲？點解變成品味象徵？
自認是哈日人，或者是中產者，一杯炭燒咖啡，係不可缺少嘅品味象徵。深褐嘅顏色，濃澀嘅味道，炭焙的香氣。捧在手，呷一口。從喉嚨深處發出「呀~~」的一聲，和飲黑啤一樣咁man，一樣咁有型。
濃重嘅烘焙味，係日本炭燒咖啡嘅特點。
窮人の恩物
之但係，喺呢個咁中產嘅時刻，如果我話俾你聽，日本炭燒咖啡，原來唔係乜嘢高檔嘢，佢嘅源起，實在係因為窮到燶，咖啡豆仲要特別渣過人。咁，會唔會有啲掃興呢？唔緊要啦，都咁大個人咯，應該能夠接受真相嘅。件事係咁嘅，話說日本戰後，百廢待興，經濟崩潰，人民生活十分貧窮。那時，日本本土沒辦法種植咖啡豆，只能向外國進口，但要向外進口優質咖啡豆，又沒有財力。於是，日本的咖啡職人，便開始研究點樣至可以用劣質嘅咖啡豆沖出美味嘅咖啡，幾經考量，終於俾佢哋諗到呢種做法。炭燒，就係利用炭做燃料烘焙咖啡豆，由於使用嘅咖啡豆，都是下價的渣豆，味道不醇，雜味極多，所以喺烘焙過程中，只能選擇深度甚至重度烘培，希望藉炭火的濃厚煙火味，掩蓋渣豆嘅雜味，結果重度烘培令到咖啡豆所有味道都被掩蓋，甚至連苦味都去到極限，連澀味都冇埋，剩低炭燒嘅濃鬱香氣，別樹一幟，與別不同，反而吸引咗一批愛好者追逐，成為日本咖啡代名詞，日本人稱之為「苦炭燒」。
以往因為用平價豆，所以要重度烘焙嚟遮掩雜味。
將軍の咖啡
其實，利用炭火嚟烘焙咖啡豆，亦唔係二戰之後才首次出現嘅。早在日本江戶幕府時代，第十五代將軍德川慶喜，就係一位熱愛咖啡嘅將軍。話說佢任將軍時，希望藉助法國之力進行西化，佢自己本人亦西化咗先。佢從法國人身上首次見識到咖啡這回事，並且一試鍾情，成為咖啡迷。嗰陣時，德川慶喜飲嘅咖啡，無論選豆、烘焙、沖煮，全部由法國人一手包辦。咖啡豆，係來自印度的阿拉比卡咖啡豆。而烘焙嘅燃料，順理成章採用當時日本最常用嘅燃料：木炭。結果，呢種用木炭為燃料烘焙出嚟嘅咖啡豆，帶有一種木材炭火的香氣，成為德川將軍至愛的口味。也可能因此，啟發咗後來二次世界大戰之後，咖啡職人重做出呢種日本專有嘅炭燒咖啡口味來。
今時今日嘅炭燒咖啡，已經成為日本品味飲食象徵。
職人の精品
不過，儘管炭燒咖啡起源於戰後貧窮，但隨着日本喺上世紀六七八十年代經濟騰飛，一躍而成世界上最富裕國家之一，炭燒咖啡亦唔需要再屈喺戰後貧窮嘅位置了。首先，咖啡豆已經唔需要用最差等級，唔少炭燒咖啡，會拼配世界各地唔同品種嘅咖啡豆嚟製作。哥倫比亞、巴西、爪哇等地嘅咖啡豆，便經常出現喺炭燒咖啡上，而烘焙亦唔需要只做到重度烘焙，中度或深度烘焙都一樣可以。萃取亦講究好多，日式手沖或者冰滴都常見，利用較低溫度，長時間滴濾進行萃取，小心避開雜味，只萃取出口感純凈嘅部分。於是炭燒咖啡口味變化更多，唔再局限喺舊時一味苦，仲可以品嘗到香，甘、醇、濃等唔同層次嘅味道。隨着技術提升，加上日本人精益求精嘅精神，今日嘅炭燒咖啡，亦都由以前窮人恩物，變成高階品味代名詞。所以，如果你鍾意飲炭燒咖啡，咁就唔係代表你窮，而係代表你識得欣賞日本嗰種職人精神，呷多兩啖，真係人都型啲架。
職人精神，係日本炭燒咖啡嘅靈魂。
