【飲食】中國人3600年前已開始食芝士？焦糖味芝士你聽過未？
外國人，個個都食芝士。藍芝士嘅濃郁發酵味、摩薩里拉芝士嘅淡淡奶香、甜甜哋嘅馬斯卡彭芝士、勁羊奶香嘅菲達芝士……仲有充滿焦糖味嘅挪威 Brunost 芝士，成千上百種，好似劉姥姥入到大觀園咁，講都講唔晒。到底芝士係邊個發明？幾時出現嘅呢？
藍芝士，愛者愛極，惡者惡極，你屬邊極？
芝士竟然有焦糖味
話說點解要講芝士，事緣最近有一隻挪威百年芝士品種，第一次嚟咗香港。傑托斯特芝士，挪威話係：Brunost。係用牛奶同羊奶混合製成，1863年挪威 Gudbrandsdalen 村莊嘅人，已經開始製作呢種芝士。佢同我哋一向食開嘅芝士好唔同，甜甜鹹鹹，仲有一陣焦糖香味，真係打破我哋一向對芝士嘅印象。點解會有焦糖味呢？唔係加咗焦糖，而係製作嘅時候，先會喺羊奶中分離出乳清，再將乳清加熱，再加入奶油及牛奶，煮到水份蒸發，形成焦糖化，芝士就會變成啡紅色，加熱時間愈長，芝士顏色亦會愈深，味道仲帶有甜甜焦糖味，就咁食，做菜式，或者整甜品，甚至芝士火鍋都得，係挪威人心中嘅美食國寶。
Brunost芝士，有股焦糖香味，係挪威國寶，十分獨特。
沙漠高溫顛簸撞出嚟
其實芝士嘅製法，幾千年前來一直大同小異。相傳芝士起源於阿拉伯，佢嘅出現，係一個美麗的誤會。話說大約在六千年前，阿拉伯商人，要遠行做生意，佢哋會騎駱駝，為防中途口渴，會將牛奶同羊奶放入皮袋入面，綁喺駱駝側邊，隨身攜帶，方便隨時飲用。但係，佢哋通常一行就幾個鐘或以上，加上又喺冇瓦遮頭嘅沙漠上，艷陽高照，駱駝顛簸，高溫搖足幾個鐘，皮袋入面羊奶早已分成兩層，上層變咗透明乳清，下層就沉澱成白塊凝脂。原來皮革中含有類似凝乳酶嘅酵素，喺旅途顛簸搖盪同太陽高溫照射下，牛奶同羊奶慢慢發酵，形成呢種半固體狀態，就係最原始嘅芝士嘞。
今日有芝士食，要多謝阿拉伯駱駝商隊。
風行歐亞非洲三千年
由於芝士既可以保存多餘嘅牛奶，又方便作旅行食物，慢慢就開始流傳到歐洲、中亞、中東，甚至非洲地區。2010年法國考古學家就喺埃及塞加拉嘅古城孟菲斯巿長卜塔邁斯嘅墓穴入面，發現咗三千二百年前嘅芝士殘渣，係全球最古老嘅芝士殘渣實物。公元前二千年初期，烏爾第三王朝入面嘅蘇美楔形文本，亦有記載芝士呢樣嘢。同期埃及墓葬壁畫中，亦有描繪芝士嘅製作，足見嗰陣時，中東同非洲一帶嘅人都已經識得製做同食用芝士。至於古代中國有冇出現過芝士呢？答案係有嘅，喺新疆塔克拉瑪干沙漠就發現中國現存最古老嘅芝士，據分析當中嘅蛋白質同脂肪，證實製作時間約為公元前一千六百多年，雖然比起中東、歐洲或非洲要遲少少，但係遲到總好過冇到，外國人 say cheese，中國人都可以 say cheese 啦。
用芝士做甜品，女士們又要準備第二個胃喇！
