【飲食】餃子原本叫「嬌耳」用作醫病？點解餃子皮有方形圓形之分？
中國有一種食物，不分地域，人人都食。
以麵糰壓扁，用棍擀成薄皮，包上肉或菜饀，捏掐成半月或元寶狀。或蒸、或煎、或煮，或炸，總之饀料汁水，都被麵皮包着，一咬，皮破汁出，鮮美無比，這就是大江南北家傳戶曉的美食：餃子。
餃子唔覺唔覺，已有超過一千八百年歷史。
名稱多蘿蘿
餃子，有好多名。唔同時代有唔同叫法，元明時代稱為「扁食」，清代稱為「餑餑」。唔同地方又有唔同名，北方普遍叫餃子，南方則稱水餃，閩南地區喚扁食，山東一帶就叫餶飵或者餶飿。唔同食法又有唔同名稱，好似陝北一帶嘅人，煮嚟食嘅叫「扁食」，蒸嚟食較大隻嘅叫「餃子」，再大隻啲嘅就叫「角子」。而嶺南一帶，過時過節亦流行炸「角仔」，亦同餃子包法幾近相同。不過無論叫乜名，追溯根源，餃子最先都唔係叫餃子。
用雲吞皮包蝦豬肉筍絲木耳絲嘅鳳城水餃，係南方餃子代表。
東漢醫聖發明
話說東漢末年，寫出中國醫學巨著《傷寒雜病論》嘅醫聖張仲景告老還鄉，返到家鄉南陽郡涅陽縣白河岸邊時，見到百姓捱饑抵寒，凍到周身病痛，連耳仔都凍到潰爛。張仲景見到咁情況，返屋企摷書，研究出了一道可以御寒嘅食療藥方，做法係用性溫嘅羊肉和一啲祛寒草藥煮湯，煮熟後將羊肉等料撈起切碎，用麵皮包成耳朵咁樣，再用原湯再將包好餡料嘅麵皮煮熟。一碗熱湯，放兩三個，食完人體發暖，兩耳生熱。呢種包饀食物，由於似耳朵，又可以治療耳朵凍傷，於是稱為「嬌耳」，而呢碗湯，就叫「袪寒嬌耳湯」。
用豬肉研薄成皮包饀嘅燕皮餃，廣東同福建都有人做。
南北大不同
後來，每逢冬至，人們就仿照「嬌耳」做過年的食物，慢慢呢啲食物又借音叫成「餃耳」、「餃子」。後來傳到南方地區，更變成日常生活食物。不過南北兩地，餃子無論形狀、製法、饀料都有唔同。好似餃子皮，南方主要係方形，北方則為圓形。擀皮呢，南方係先將麵糰壓成大薄塊再切成小方塊。北方則將麵糰捏出小麵糰，再擀成小圓皮。而南方水餃，講究皮薄。北方水餃，唔介意厚。包法亦有唔同，南捏北擠。形狀亦唔一樣，南方水餃較長較方，北方水餃包得較圓。饀都唔同，南方會包蝦肉、豬肉、筍絲、木耳、冬菇等。北方多為豬肉、大葱、韭菜、雞蛋等。真係南北大不同，各處鄉村各處例。只係好食無分南北，只要啱口味，南北一樣通殺，唔使畀面啦！
日本煎餃子，都係源自中國餃子架。
