【父親節】自助餐竟然源自海盜？曾被視為極唔文明嘅食法
生蠔，有。虎蝦，都有。長腳蟹呢？當然冇漏到。
現場即烤巨型牛扒呢？仲要現點現切喎。呢，嗰邊咪擺好晒架步囉。仲有沙律吧，各式麵包。芝士、火腿、凍肉、莎樂美腸嘅頭盤枱。餐湯、熱葷、當然唔少得啦。水果、甜品、雪糕……仲有各式各樣飲品都可以自取。自助餐，係香港人最最最愛嘅美食方式，冇之一。
海鮮拼盤，有齊龍蝦虎蝦生蠔蟹腳青口翡翠螺……係自助餐主要目標嚟架。
Buffet係法文，自助餐係日文
今日父親節，先祝各位爸爸：父親節快樂。快樂，好多時都同飲食有關。相信呢一刻，好多人正同老婆仔女一齊嘆緊自助餐，慶祝父親節吖嘛。咁，就不如講下自助餐究竟係點嚟架啦。Buffet，係法文，意思係矮櫃。因為法國人會招待朋友到屋企玩，矮櫃上面擺滿餐點等朋友自取，慢慢人人都叫呢種食法做Buffet。至於將Buffet翻譯成「自助餐」呢三個字，就係日本人。昭和33年，即係1958年，東京帝國酒店引入西式流行嘅Buffet，將所有食物放在一桌，客人依據喜好自助取食，名稱亦由法文嘅Buffet翻譯成漢字嘅：自助餐。
一張餐枱，放滿各式各樣食物自取，原來係海盜最愛食法。
北歐海盜慶功宴，識食梗係用刀食
呢種自助食法，據說起源於8世紀至11世紀嘅北歐。當時斯堪的納維亞半島出名多海盜，海盜搶掠之後，首領會大宴群盜，以示慶賀。但海盜唔熟悉亦唔習慣當時西歐人扮晒嘢食西餐嘅繁文縟節，佢哋費事麻煩，就將所有食物同飲品，放晒喺一張大枱上，邊個鍾意食邊啲，自己埋嚟睇埋嚟揀，揀啱邊忽肉，就用刀割落嚟，自己慢慢享用，食完仲用把刀去剔牙，真係豪邁到一個點。呢種自由自在加自助嘅飲食方式，被稱為「斯堪的納維亞式餐前冷食」或「亨聯早餐」，就係自助餐嘅前身。
大大塊肉，現場即切，真係睇見都流口水。
口裡雖說不，但身體很誠實
海盜食法，當然豪邁，不拘小節啦，但就不為當時西歐文明國家所接受，佢哋甚至嘲笑呢種北歐食法，係「不文明的吃法」，不屑一顧。只是，口裡雖說不，但身體很誠實。由於自助餐的確無拘無束，隨心所欲，選擇又多，漸漸有西歐人開始接受並仿傚呢種食法。加上餐廳飯店老闆，唔使再為顧客提供侍應等餐桌服務，慳番唔少人工同成本。於是，自助餐好快就風行歐美各國，而且發展迅速，大肆流行。即使到咗今日，西方仲有唔少自助餐廳以「海盜餐廳」嚟命名，足見緣由就係蛻變自北歐海盜。不過，儘管自助餐源於海盜，但規矩已經進化文明咗好多，所以記得唔好爭先恐後，或者鍾意就成塊成碟拎返埋位，因為如果係咁，咁就真係同當年未進化嘅海盜冇分別，係野蠻人嘅行為嚟呀。
任取任食甜品，為自助餐劃上完美句號。
