飲食｜蕎麥麵曾經係窮人恩物？ 日本人唔會俾女兒下嫁食蕎麥嘅人？
講到日本人最愛麵食，除咗拉麵、烏冬之外，蕎麥麵一定榜上有名。佢嘅受重視程度，甚至比其他麵食更高。好似東京人喺過年前一天，習慣食年越麵，象徵延年益壽。而年越麵，就係蕎麥麵。佢亦同鰻魚、壽司、天婦羅並稱為江戶四大美食，十分巴閉。
蕎麥麵同鰻魚、壽司、天婦羅並稱江戶四大美食。
愈貧窮愈蕎麥
過年前一日要食蕎麥麵，咁吉利，咁蕎麥麵一定係代表富庶，喻意豐衣足食啦。如果你咁諗，就大錯特錯喇。蕎麥麵喺舊時嘅日本，原來係同饑荒、貧窮等等有關。佢嘅起源，都係同貧瘠扯上關係。話說蕎麥呢種農作物，並非源自日本，而係產於東亞北部高緯度寒冷嘅貧瘠土地上，呢啲地方，連小麥都種唔到，蕎麥因為粗生，所以成為當地人僅能種植嘅食糧。蕎麥喺日本，好早就出現，繩文晚期出土嘅陶器中就發現咗蕎麥，證明三千年前蕎麥就已經喺日本生根，比稻米仲要早出現。蕎麥喺日本，多數係喺苦寒地區落地生根，長野，山梨、信州、新潟等地都係蕎麥產區，自古就有食用蕎麥嘅習慣。
灰灰暗暗嘅蕎麥麵，曾經俾武士同貴族睇唔起。
有女唔嫁俾佢
呢啲地區，冬日成日落暴雪，稻米、小麥都種唔成，人民生活困苦，只可以種植蕎麥度過苦日子。好在蕎麥生長速度超快，所以即使遇上饑荒，都可以成為救災食物。公元722年就有文獻紀錄，建議以蕎麥作為救荒農作物；《續日本紀》中也提到：「今夏無雨苗稼不登，宜令天下國司勸課百姓，種樹晚禾蕎麥及大小麥，藏置儲積，以備年荒。」亦因為咁，蕎麥喺日本人心目中，一直係窮人食物嘅代表。
江戶時代，較富裕嘅日本人都睇唔起食蕎麥嘅人，好多人甚至唔俾女兒下嫁食蕎麥嘅人家，簡直係歧視。當時嘅武士同貴族，覺得潔白嘅大米先係身份象徵，蕎麥顏色灰灰暗暗的，一啲尊貴感都冇，寧願死都唔願意食。當時只有一啲廉價旅館，會提供蕎麥麵俾投宿客人，蕎麥麵於是成為平價旅館嘅食物代表。今日東京好多蕎麥麵店，門口經常出現「藪」或者「砂場」呢啲名，指嘅就係種植蕎麥嘅荒蕪土地。
蕎麥麵配天婦羅，係好多人心目中嘅至愛。
江戶四大美食
咁賤嘅食物，點解會搖身一變，成為「江戶四大美食」之一？呢個同德川家康定都江戶大有關係。十七世紀，德川家康選定隅田川口小村莊作為日本新政治中心，諸侯、大名、武士紛紛進駐；呢啲特權階級，主要食農民上繳嘅白米做飯，但低級一啲嘅工匠、漁民同農民，就冇錢買白米，於是改食用蕎麥製成嘅食物。最初蕎麥並唔係用嚟做麵，而係製成糕餅，先煮後蒸，放喺裝咗熱水嘅桶上面食，稱為「蒸し蕎麥」。
江戶中期後，蕎麥至開始做成麵條，當時，一位由朝鮮到日本嘅僧人元珍，發覺蕎麥麵唔夠小麥做嘅麵條咁韌，就加入少少小麥粉嚟做，由於口感好，受到江戶人歡迎，成了廣為流傳嘅「茹で蕎麦」，令到蕎麥麵更普及。後來更演變出將煮好蕎麥麵冷卻放喺竹篩上食，稱為「盛放蕎麥」，因為涼爽好食，令到蕎麥麵更加走紅。
十八世紀中葉，蕎麥麵更加多咗配菜，雞蛋、鰻魚、天婦羅都可以，愈食愈豐富。十九世紀中葉，江戶已有超過七百間蕎麥麵專門店，連屋台立食都有，證明人氣度十足。不單人氣，蕎麥麵更加躍升為江戶四大美食之一，同鰻魚、壽司、天婦羅齊名。至此，我諗連蕎麥麵自己，都唔記得佢以前係個窮到燶嘅傢伙，曾經俾人勁睇唔起呀！
