馬志威感激楊茜堯林夏薇任叉頸摸面演出 自揭成「渣男」專業戶主因丨獨家
發佈時間：07:00 2024-11-26
馬志威繼內地劇《三十而已》後，在《黑色月光》再演「渣男」角色，不過他完全不介意演反派，因心目中「蔣基俊」是個悲劇人物，他又自揭成「渣男」專業戶主因。講到跟視后楊茜堯和林夏薇首合作，他大呼過癮，更感激兩女對他極信任，就算提出叉頸及摸面演出要求，她們都一口答應，極之配合。採訪：杜杜 攝影：朱偉彥 形象:Dom CHEUNG 髮型:Alex SO@the attic 化妝:Sakura 服裝:@dunst_official @fdmtldenim @lanecrawford
內地已播畢《黑色月光》，馬志威感恩反應極好，「多謝觀眾！多謝大家嘅謾罵！哈哈！」對於被鬧他絕不介意，「都係鬧『人渣沖落廁所』嗰啲，我OK、接受到嘅，好多謝佢哋謾罵又好，讚賞又好，多謝佢哋咁投入睇呢個劇，佢哋憎呢個角色咪啱囉，呢個角色係討人厭嘛！」他又開心觀眾睇得出「蔣基俊」的變化，「開頭啲觀眾鬧得佢幾甘，之後有個反轉，見到大家同情『蔣基俊』喎！臨尾『蔣基俊』出返嚟唔同咗，有嘢在意、有包袱，唔係以前肆無忌憚嘅人，有包袱就注定失敗，見到觀眾睇得出呢個分別，都好驚訝佢哋睇得咁細心。」
演反派冇框框夠過癮
對於演反派角色，馬志威完全不介意，反而認為可以有更好發揮，「做得演員就唔會有框框，反而觀眾認為嘅反派，對演員嚟講仲好玩，再易做啲，正派反而有個框，不能太過份，反派係冇框，『蔣基俊』係鍾意玩，鍾意亂嚟，所以我投入角色係用緊玩同亂嚟嘅心態演，過癮好多。」繼《三十而已》後再演「渣男」，更被封為「渣男」專業戶，馬志威就笑着自揭製作人愛搵他演的原因，「我個樣天生衰囉！哈哈！唔係點啫！一定關事，佢哋話我個樣線條好分明，好惡咁，某程度上都係優點。」被指樣衰他一樣好受落，「呢行大把靚仔，我都唔係靚仔，冇所謂啦！」39歲的他又坦承狀態大不如前，「𠵱家年紀開始大，有時覺得左眼冇力，會鴛鴦眼，最近拍戲又多條疤，塊面又多咗皺紋，都要接受自己，都39歲，每個人都會老，我好接受自己呢個樣。」
讚楊茜堯夠man易合作
對於跟兩位視后合作，馬志威好開心，反而冇壓力，「合作得好愉快，多謝阿怡同薇薇信任我，因為我喺現場會拋好多意見，因為『蔣基俊』係會亂嚟，演嗰陣唔可以咁循規蹈矩去思維。」講到楊茜堯氣場勁，他就答得搞笑，「我個氣場都唔弱㗎！唔會蝕畀佢，同埋呢個角色唔可以驚，做咩要驚佢啫，『余滿月』係『蔣基俊』邊個啫？！佢除咗老竇冇嘢怕㗎喎！如果我有怕呢個心態，演唔到呢個角色。」他又自爆私底下跟楊茜堯有暱稱，「我叫阿怡做怡哥，佢好man，係好爽直嘅人，佢就叫我灰太狼。」他讚跟茜堯合作過程極愉快，「我第1場同佢嘅對手戲，就係喺office叉頸嗰場，我覺得有需要就問佢咁做得唔得呀？怡哥話『冇問題呀，你係叉就大力啲𠻹呀』，佢嗰種爽直，係令到我演得好舒服，好多謝佢畀呢個信任度我，令我可以放膽去做。」
驚訝林夏薇入戲好深
講到劇中「老婆」林夏薇，馬志威見到對方投入「卓慧雲」程度，都有點嚇親，「喺現場見佢咁低氣壓，有時我都叫佢返嚟呀，拍戲咋！佢好into個角色，我都好驚訝，同埋佢都真係演得好好，有幾場都覺得平時林夏薇唔係咁，真係完全唔同感覺喎！」跟薇薇對戲過程，他一樣有讚無彈，他最深刻要數劇集尾聲，「卓慧雲」殺「蔣基俊」一場戲，「雖然我喺戲入面成日話好討厭佢，但係其實係好愛佢，要幾愛一個人，先會幾憎一個人，佢係曾經進入過『蔣基俊』個心為數不多嘅人，對『蔣基俊』嚟講佢係好重要嘅人，臨尾佢殺我嗰場，講我綁咗佢喺側面望住佢醒，後尾我加咗個動作，我摸佢塊面，但係嗰個摸係充滿愛意，有個複雜性喺度，呢個就係薇薇信任我。」
