Juicy叮｜老婆辭職後拒做家務兼虛榮心強 人夫呻慘被「榨到乾」
發佈時間：17:32 2023-01-09
夫妻的相處之道在於互相體諒與扶持。有人夫在網上發文，大呻太太在辭職後拒做家務，加上虛榮心強，令自己快要被對方「榨到乾」。
該名人夫在香港討論區以「一個辭咗職又唔做屋企野嘅老婆」為題發文，提到太太原本已不太負責家庭開支，一年前更開始「連自己卡數都開始愈畀愈少要我幫佢找」。隨後，直到樓主開始無法負擔太太的卡數並與對方吵架，太太再坦承已沒有工作一段時間，「一句唔想畀我壓力就兜咗件事」。
請點擊組圖瀏覽：
樓主續指，太太開始全職主婦的生活後，雖然有照顧小朋友，但拒絕做家務，「打掃洗衫收拾樣樣欠奉」，並指她偶然會當自己是酒店大廚一樣下廚，「自己炒幾炒影個相放上網呃like演戲完留個亂晒到處油嘅廚房畀我洗碗收拾，還原整理廚房時間仲耐過佢煮飯。」
樓主指，太太在家中有9成時間是「玩電話、煲劇煲到日夜顛倒」，自己下班回家時，亦會在廚房發現大量包裹盒以及未清理的垃圾及垃圾袋。他又提到太太的煙癮大，「個個鐘都去廁所煲煙搞到細路都話臭但又要扮好媽媽唔畀細路知食煙」，而且脾氣臭，「一遇到唔順就係度爆攞細路、家人出氣，出面又係扮好好相處媽媽」。
相關新聞：
Juicy叮｜夫妻各有正職 新婚人夫：每個月畀固定家用屬正常？：https://bit.ly/3irLJ1u
Juicy叮｜老公日日被女同事胸壓 人妻心淡欲離婚因一事感躊躇：https://bit.ly/3GP31i9
Juicy叮｜去旅行擬安排老爺奶奶坐經濟艙 港女夫婦一原因坐商務艙惹議：https://bit.ly/3IyYr9b
他續指，太太「成日就鍾意去歌頌人地老公賺幾多」，並指自己「做野份糧出晒佢洗費之餘，仲要食好嘢買好嘢滿足佢虛榮心」，令他大呻自己快要被對方「榨到乾」。他不禁在文中表示，「拜託妳出返嚟做嘢啦，雖然妳都係唔會出錢。或者飛咗我搵個有錢老公囉。」他直言有打算離婚，「等佢真係反省下同做下自己應該做的義務。等個法官講可能公平好多」，但指「細路就係最大包袱，無細路的話一早走人」。他稱曾與對方多次溝通，「但次次佢都企硬自己利益絲毫唔退讓，咁其實又可以點樣。」
相關帖文隨即引起熱議，不少人安慰樓主指，「都係做多啲自己鍾意做嘅事啦」、「結婚前睇唔出嘅咩？事到如今，我覺得可以分居及離婚，個仔跟你， 因為你有責任心」等。部分人則勸喻樓主離婚，並指「快啲離婚啦，回頭是岸」、「同佢攤牌，唔改就離婚，反正都冇咩感情，狠心啲大家一條生路」等。
有人則建議「女人好多時都係受軟唔硬，男人好多時喜歡理性討論。試下搵個時機，做啲浪漫嘢，或整個驚喜畀佢，然後來個深度溝通」、「兩夫婦一齊去見下婚姻輔導」、「她唔適合做全職媽媽，她出返嚟做嘢，請工人湊B+做家務，完」等。有人直言「請工人囉，一係離婚」、「樓主你自己眼光嘅問題等如去賭場賭一鋪，一結婚就註定你已經輸咗」、「家家有本難念的經」、「深表同情，如果你真係覺得佢咁差嘅，就直接離婚算啦。但我覺得你只係想呻下啫，你唔係真係想同佢離婚。你應該都算係一個好男人，否則冇可能忍受得到。」等。
帖文來源：香港討論區
