專訪｜潘紹聰靠講鬼故「樓換樓」變投資王忌買凶宅曾住西貢撞鬼嚇到退租

更新時間：11:00 2023-10-12
發佈時間：11:00 2023-10-12

「鬼王」潘紹聰（Edmond）為慶祝靈異節目「恐怖在線」15周年，10月在壽臣劇院舉行舞台劇《死鬼老婆》Ｘ恐怖在線現場版，邀得《正義迴廊》麥沛東、ToNick主音恆仔（趙善恆）及YouTube頻道「小薯茄」成員童童（蔡曉童）主演。眾人於農曆七月展開綵排，豈料怪事接連發生，想不到四人各自都經歷過詭異事情，仲一個比一個恐怖。

【相關閱讀】：死鬼老婆｜鬼王潘紹聰搞舞台劇賀「恐怖在線」15周年農曆七月排戲怪事接連發生

【點擊睇《死鬼老婆》演員撞鬼經歷】：

53歲潘紹聰廿多年前在香港電台任節目助理，由報道交通消息到主持深夜音樂節目，後來因接手主持新城節目《恐怖熱線》而為人熟悉，直到2008年轉攻網台，並創立網台「好大個網」，付費會員數目逾萬，年初有傳月袋過百萬！近年，他亦涉足影視圈、舞台劇兼出書，靠講鬼故發圍賺得第一桶金，由2003年入市再以「樓換樓」累積大量財富，直到三年多前以3,200萬沽出太子逾千呎單位，賬面勁賺732萬。對此，潘紹聰謙稱目前手持一棟自住物業，現樓市動盪也暫時不會入市，問可曾考慮投資凶宅？他即耍手擰頭：「一定唔掂，啲鬼突然出現我會驚。」

原來「鬼王」也非天生膽大不怕鬼，潘紹聰自爆接手《恐怖熱線》前，曾於昔日西貢村屋住處見到靈體，當時零經驗的他嚇到不敢回家，更立即退租搬遷，後來多接觸靈界知識才壯大個膽，「你了解得多、知道佢點解要搵嗰個人，來去都係因為得罪人、怨親債主嚟搵你，或者祖先山墳處理唔好、冇拜祖先……只要你正正經經做番正常人、冇去害人，佢哋就唔會太接近。」

猛鬼小薯茄辦公室

不過時運低都易「瀨嘢」，三位演員亦各自分享靈異經歷，童童稱曾在辦公室以語音輸入為影片配字幕，豈料撳掣後未發聲，系統便自動輸入「Hi, I’m here」，令獨留公司的她當堂嚇一跳。曾執導電影《救殭清道夫》的恆仔，最深刻在元朗荒廢學校拍戲，其間收音師煞有介事嗌Cut機走人，原來對方聽到不少聲音怒趕劇組離開，最後眾人補上香後繼續拍攝。膽生毛的麥沛東曾參加網台靈探節目《E娃鬼叫》，試過玩碟仙又去新娘潭招魂，有次在北角皇都戲院大廈拍攝時，他忽然被一道怪力扯低掛頸托盤，盤中物品即散落地面，麥沛東強調絕非造假：「當時我即刻爆粗，真係好驚，嗰度冇窗本應好焗，但係涼浸浸㗎。」

對此，潘紹聰奉勸大家盡量遠離溪澗、湖泊等地為妙，尤其大埔新娘潭更堪稱「猛過墳場」！他又親授兩招簡易辟邪法：首先在衣紙舖買一張「百解符」，隨身攜帶可防患於未然，假設已不幸遇上靈異事件，立刻跨過燃燒的報紙便可保平安。至於坊間流傳「爆粗」可驅邪，他笑謂：「某程度可以嘅，如果靈體弱過你就得，不過佢哋都有機會嬲，咁就會結怨，所以都係禮多人不怪，禮貌請佢走好啲。」

【點擊睇《死鬼老婆》演員撞鬼經歷】：

恆仔排戲觸景傷情？

《死鬼老婆》改編自「恐怖在線」經典真人真事鬼故《有心人》，講述經歷喪妻之痛的調酒師阿生（恆仔飾）在一間酒吧展開新生活，惜整天在老闆（麥沛東飾）的姨仔子彤（童童飾）身上感受到亡妻的影子，二人逐漸被怪事纏身。今年2月恆仔與拍拖10年的譚杏藍（小花）宣布分手，相隔7個月女方高調認戀新歡Ronald，旋即被網民質疑曾一腳踏兩船，未知排劇期間是否擔心「觸景傷情」，恆仔坦言不敢參與「死鬼老婆」的背景討論，只待導演指示，認為目前是鍛鍊一個人生活的機會。問可有勾起傷心回憶？他卻不願多談：「做演員呢啲都係養份。」

劇中帶出珍惜眼前人的訊息，麥沛東去年底與拍拖5年的圈外女友趙雪翎結婚，二人婚前一直未有同居，屢因見面少、文字訊息上的誤會而嗌交，幸婚後多溝通便大大減少拗撬，他認為所有困難都可一起克服：「唔開心同憤怒過咗就要放下，唔好畀佢不停Loop，對自己身體都唔好。」並自爆一直計劃「造人」，望密密接Job賺奶粉錢，給予下一代更好的生活。而自言是「職場新人」的童童，直言面對一班前輩甚大壓力，但亦開心能與多個界別的人才合作：「我抱住嚟學嘢嘅心態，今次都會乖乖哋聽清楚指示。」

採訪：黎寶倫
攝影：羅安強
化妝：Chi Chi Li & Elaine Lai
髮型：Roy Fan
服裝： @shiatzychen、@converse_hongkong（恆仔）；Harvey Nichols HK、 Charles & Keith（童童）；Issey Miyake（麥東）
造型： @m.mmmatthew（恆仔）、Exactly the Sam（童童）
場地：Club Revel