小薯茄阿冰細妹吳泳疑偷食已婚健身教練 大婆IG公開捉姦片：小三裸體繼續瞓
發佈時間：11:29 2025-02-25 HKT
YouTuber小薯茄阿冰（吳冰）的妹妹吳泳今日（25日）傳出偷食已婚健身教練，疑為網紅健身教練的新婚妻「FaFa Tse」在IG上嬲爆發文，標籤吳冰爆料，疑似其妹出軌人夫。據指，網紅健身教練結婚時，小薯茄的成員曾去觀禮，又有一齊拍片，估計雙方關係不錯。而小薯茄在事件曝光後，在IG發聲明表示：「立即與該健身教練終止個別成員的贊助合作，就事件為公眾帶來困擾和影響，我們感到抱歉和遺憾。」並提到：「基於事件不牽涉本公司成員，以及涉及他人私隱，我們及後將不會對事件作任何回應，謝謝大家的關心和體諒。」
吳泳IG已刪除 疑似色慾短訊曝光
人妻「FaFa Tse」的老公William有指是一位網紅健身教練，與小薯茄有合作，二人去年11月結婚，「FaFa」的IG有不少婚紗靚相，而二人婚禮當日小薯茄的成員程仁富也有到場。「FaFa」昨日在網上分享開心與朋友聚會，突然變成疑似「捉姦」，「FaFa」今日在IG限時動態出PO，凌晨時分闖入辦公室，更爆出疑似老公及吳泳的色慾短訊。疑為三角關係的主角合照也在網上曝光。吳泳IG現時已經刪除。
相關閱讀：吳泳傳偷食人夫丨阿冰妹妹疑與三角關係主角合照曝光 小薯茄多交集程人富任婚禮兄弟
人妻「FaFa Tse」︰我老公偷食小薯茄泳泳
「FaFa」公開的照片中，見到一張半裸女士躺左地上的照片，再配上文字：「我老公偷食小薯茄泳泳」，又有一幅小薯茄泳泳的對話截圖。「FaFa」之後再出影片，見到辦公室內一地衣服，轉角準備上樓梯時，就有一名健壯男士現身，估計男方是「FaFa」的大隻老公。而片中又見到右上角疑有一女子閃閃縮縮，未知是否「FaFa」所指的吳泳。
吳泳疑無著衫
「FaFa」在片中拾起地上的牛仔褲再丟開，留言：「上PT唔洗著褲」。之後又貼出老公的背景，放大字體寫上「出軌」，又稱：「我心目中嘅好男人，我理上（想）老公，作為榜樣嘅老公陪佢行過好多路嘅人，日日SUPPORT佢嘅人。同小薯茄。啊冰個妹搞野（嘢），今次第3次俾我捉姦，衫都無著。」
吳泳疑捲「偷食」男方IG轉私人
「FaFa」相隔一個小時再發文：「其實我真係唔再適合佢，因為我唔再有新鮮感俾到佢，我只係希望唔好有下個學生Flirting pt 同偷食。」「FaFa」指老公是「壞咗嘅人」、「再也不見」。又用17字寫下感受：「親眼見到我真係崩潰，全身震晒就快要暈。」疑似「捉姦」片曝光後，男方的IG帳號已轉為私人。
吳泳疑為樓梯女裝褲主人
「FaFa」今早再在IG限時動態出PO，指「事件發生咗8小時交代全件事」，「FaFa」表示：「我11點名朋友house warming完打算返去我哋嘅健身室踩機，去到門口禁（撳）鐘（我平常懶用鎖匙）等咗好耐無人開，聽到佢由閣樓跑落嚟，開門一刻啱啱著緊衫。本身佢話Fu哥肥man上緊堂，我問人呢？嗰刻我未feel到，直到佢唞大氣唔出聲，樓梯有條無著嘅女裝褲，我問上面係咪有人？佢話：泳泳同肥man唔好上去啦。我問：點解？佢話：佢哋high咗大X。我話：點會啊！佢哋二個一定唔會（其實你點解要連累人？）佢話：唔好上去。唔好做任何嘢，我哋未做未開始。」
吳泳被指事後繼續瞓
「FaFa」坦言目睹一刻全個身都震：「我而家打字都仲手震，全個身都震，你目睹心愛嘅人同另一個女人裸體瞓喺到，仲要講句：未開始，個感覺難受過食屎。」「FaFa」期間曾問道：「期間我問William：發生咗幾多次。第幾次呃我。佢話：未開始。我話：到呢刻仲講大話？佢話：3次 #期間小三喺我哋側邊裸體繼續瞓」。「FaFa」出PO後收到好多人關心，她亦在限時動態中感謝：「收到好多dm，感謝你哋。幫我鬧賤男幫我爭返啖氣。我真係好無助好崩潰，當中好多內情我唔敢公開，我忍呢次最後一次對你好@williamt_wbffpro 再也不見」。
小薯茄IG聲明原文：
首先謝謝大家關心，本公司與旗下所有成員同樣透過報導才得悉事情，亦立即與該健身教練終止個別成員的贊助合作，就事件為公眾帶來困擾和影響，我們感到抱歉和遺憾。
鑒於網上出現有關本公司及旗下藝人的不實消息，本公司認為有澄清之必要。本公司及成員對事件並不知情亦不認同，在此嚴正聲明，對於坊間誣蔑參與或涉及任何違法行為更屬無稽，本公司將保留一切法律追究權利。
基於事件不牽涉本公司成員，以及涉及他人私隱，我們及後將不會對事件作任何回應，謝謝大家的關心和體諒。今後，小薯茄將繼續努力如初，專注於我們的工作。
最後，我們再次對事件造成公眾困擾致歉。由於事件中所牽涉非公眾人物，事件亦屬私人事件。我們衷心懇求大家能給予有關人士適當的處理空間，也不希望事情繼續佔用公共資源。
謝謝大家的關心與諒解。
小薯茄
