巴士無冷氣躁漢走音大鬧唔識揸車女車長金句回應：唔好坐ＸＸＸ｜Juicy叮

更新時間：15:58 2023-08-21
發佈時間：15:26 2023-08-21

天氣炎熱人的心情也格外煩躁，加上沒有冷氣便變得躁上加躁。一名身材健碩的男乘客因為巴士上沒有冷氣而向女車長大發雷霆，質疑對方唔識揸車而展開長逾2分鐘的罵戰，期間還一度罵至走音。結果遭女車長反駁無理取鬧，連爆金句指「我點樣揸車唔使你教」、「依家係我揸車唔係你揸車」、「你驚嘅話你唔好坐，好簡單」。最終，因女車長一個決定而擺平事件......

躁漢、女車長相嗌唔好口逐格睇＋網民批判式回應↓↓↓↓

躁漢提醒車長小心揸車

短片長約2分16秒，樓主以「我揸車又唔係你揸車，唔駛你教…」為題在facebook上載片段。開始時兩人已在對罵中，同場還有準備上車的另外數名男女，車頭顯示板不斷循環元朗「形點I」與「Yoho Mall I」字樣。

穿貼身灰色上衣，戴黑色口罩、粗金頸鏈、前揹背包的短褲躁漢，與女車長大概因為車上沒有冷氣問題而發生爭執，躁漢「老虎頭上釘蝨乸」，批評女車長唔識揸車，提醒要小心揸車，指「著唔著車都唔知呀」，並揚言自己有20年「爬士」經驗，卻被女車長反駁「我唔知你要揸幾多年，我唔理幾多年」、「我揸車你就聽我講」、「依家係我揸車唔係你揸車」。

雙方你一言我一語的嘈個不停，加上躁漢死纏爛打，待女車長準備開車時走音呼喝：「開車啦，小心啲揸車呀」，氣得女車長在駕駛席回頭回應「關你鬼事呀」，躁漢還反駛「咩唔關我事呀」。結果，盛怒的女車長決定落車找站長處理事件，全車人幾乎一齊嘆氣。躁漢、女車長相嗌唔好口詳細實錄請看↓↓↓↓

躁漢、女車長相嗌唔好口實錄↓↓↓↓

躁漢：我勸過你小心啲揸車
車長：我點樣揸車唔使你教

四眼乘客：佢有牌，人哋俾咗張證佢
車長：我有牌個喎，我使你教我呀

躁漢：著唔著車都唔知呀
四眼乘客：好小事啫

躁漢：小事，有冇攪錯呀，小事
四眼乘客：佢唔係，佢著到車冇冷氣呀，唔關著唔著到車事呀

四眼乘客：問題係人哋開咗架車.....冷氣唔知呢，關唔關著唔著車咩事
躁漢：成架車未著呀，知唔知呀

四眼乘客：著咗呀
車長跟女乘客講：係佢無理取鬧，係佢自己攞嚟搞，咁咩依家投訴話無冷氣

躁漢：你唔知頭唔知路就唔好出聲
車長：你驚嘅話你唔好坐，好簡單

躁漢：總之你小心啲揸車
車長：我唔使你教，我揸車唔使你教

躁漢：我揸廿年啦「爬士」呀，你知唔知呀
車長：我唔知你要揸幾多年，我唔理幾多年

車長：我揸車你就聽我講
車長：依家係我揸車唔係你揸車

躁漢行入車廂後走音呼喝：開車啦，小心啲揸車呀
女乘客：哎吔，唔好嘈啦

車長在駕駛席回頭：關你鬼事呀
躁漢：咩唔關我事呀

車長：你影響我揸車啊，你喺度依家
躁漢：唔好出聲（舉機拍車長名牌）

車長：你騷擾我，我可以報警㗎
躁漢：報警，報咩警呀（未完，躁漢、女車長相嗌唔好口詳細實錄請看上圖↑↑↑↑）

躁漢、女車長相嗌唔好口逐格睇＋網民批判式回應↓↓↓↓

英勇四眼男助車長反駛躁漢

其中一名英勇四眼男乘客與躁漢對話，指「佢（車長）有牌，人哋俾咗張證（意思指揸巴士車牌）佢」，並指「好小事啫」、「佢著到車冇冷氣呀，唔關著唔著到車事呀」。回應的網民也替女車長說話，指「恰女人」、「人哋公司有指引，你投訴冇冷氣咪等下部，等人維修囉」。

躁漢、女車長相嗌唔好口逐格睇＋網民批判式回應↓↓↓↓

有人附和「又係管其他人事件，開車發現無冷氣之後仲出唔出車，係由巴士公司決定，乘客只有得揀搭定唔搭。企響度管人點做已經越線，只有做成無作用的糾紛，影響社會和諧」、「死佬，阻Q住晒，成車人為你一個無理取鬧而影響到，以後唔好搭巴士搭的士啦，Ｘ街！」。

網民讚女車長英明決定

另有網民稱讚女車長的決定，指「我覺得女車長要讚嘅地方就係個客影響咗佢情緒唔應該開車，唔好有大埔2.0（註：2018年大埔公路雙層巴士翻側，造成19人死亡、67人受傷），正明佢還很理智」、「司機做得好吖，大家落車唔好搭啦」。還有人清醒地反問「無冷氣，同識唔識揸車有乜關係呢？」、「到底係投訴司機唔識揸車定唔識開冷氣？」。其他網民回應請瀏覽上圖↑↑↑↑。