企業熱話——聖保羅書院樹人170年各界名人校友REUNION

企業熱話

Jacky哥

2021-10-28 04:18

生活專欄

內容

　　西半山傳統名校聖保羅書院，歷史悠久，歷年來培養精英學生無數，好似早兩年喺香港中學文憑試中，便首次誕生了文憑試超級狀元，拿取8個5**佳績！到今年踏入170周年，學校一連串慶祝活動會以「傳承歷史．開創未來」做主題，上周便邀請校友回校，齊齊見證170周年校慶專巴及電車啟航，以及啟動由校友發起嘅「聖保羅獎學基金」！
　　小弟見到當日回校嘅校友有着齊校服捧場、前立法會主席曾鈺成，還有政府專家顧問及中大呼吸系統科講座教授許樹昌、大家樂主席羅開光、中文大學醫院營運總監及中文大學醫學院副院長胡志遠、南華體育會副主席盧潤森等。
重穿校服回校園感念當年點滴
　　最令人感受深刻嘅係大師兄曾鈺成著住校服，分享在學期間成立學生會嘅趣事，聽著望著時，有點時光回流嘅味道！校友羅潤光就介紹了學校獨有嘅「西瓜波」傳統：校園空間有限，為咗踢波而不弄傷同學，於是書院興起以膠製成嘅「西瓜波」玩耍，從此成為學生們在校嘅獨特回憶。
　　而前香港電台助理廣播處長張文新，就話當年曾經諗過唔讀呢處，佢話因為當年家住上水，每日花5、6小時返學，所以想輟學，點知未實行便有老師為他準備好全套課本送往家中，鼓勵佢繼續升讀至中六！
創立獎學基金為學子創造機會
　　校長源廸恩分享，學生及校友之間嘅兄弟情是聖保羅嘅最大特色，而家成立嘅「聖保羅獎學基金」，就係為不同背景嘅學生而設，提供入讀聖保羅書院的機會，支援佢哋嘅學費及參與課外活動嘅費用，預計未來數年可惠及逾30至36名學生。另一方面，獎學基金又可以讓學生們，能有機會與不同階層嘅朋友一齊玩耍及學習。
　　大家樂主席羅開光亦喺訪問分享話，當年學校有不同背景嘅學生一同上課，非常珍惜當時嘅光陰，而家成立獎學基金，正正可以讓不同階層嘅學生都有機會就讀聖保羅書院。
　　呢個基金主要頒發給有需要嘅基層家庭，目標是籌得六千萬元，連同校內現有嘅「學費減免計劃」，預料6年後可惠及逾100名學生。一年學費連同課餘活動嘅費用，預計每位學生可獲5萬元獎學金。
慶祝活動陸續有來密切留意
　　都話連串慶祝活動，嚟緊呢個星期日，喺香港文化中心大劇院便有場音樂劇《保羅．我們的聖保羅》，之後喺12月亦有由舊生合唱團演出嘅籌款音樂會；明年將陸續舉行校慶講座、大型歷史展覽等。咁有歷史嘅學校嘅連串慶祝活動，係咪好值得大家留意呢！
Jacky哥