元宵食鮑魚 曹操、王莽都係鮑魚粉絲
今日年十三，仲有兩日就初十五。按中國傳統，初一至初十五，稱為春節。過了初十五，代表春節完結，正式迎來新的一年了。十五元宵，明月正圓，有團圓之意。一家人會在這日團聚一起，猜燈賞月吃晚飯，除了吃湯圓，富貴的人，當然少不了鮑參翅肚，其中鮑魚，乃四大海味之首，是主角中的主角。
鮑魚形像元寶，有富貴的意頭。
鮑魚唔係叫鮑魚
人人都鍾意食鮑魚，但唔通人人都知佢以前唔係叫做鮑魚咩。鮑魚古時叫鰒，又叫鏡面魚、九孔螺、明目魚、將軍帽，係一種海生軟體動物，屬於腹足綱鮑科嘅單殼海生貝類。通常喺水溫度比較低嘅海底生活，棲身海底岩石叢中，以藻類做食糧。海帶、龍鬚菜、紫菜都係佢嘅主菜，食海帶嘅鮑魚貝殼會變成帶綠色，食紫菜、龍鬚菜嘅鮑魚貝殼就變成帶紅色。鮑魚品種極多，遍及全地球，粗略數一數，日本北部、中東、印尼、北美洲西岸、中美洲墨西哥、南美洲、南非、澳洲等地都有，還有中國東北大連一帶海域出產的大連鮑，台灣海域產的九孔鮑，都以新鮮清蒸或製成罐頭出售。
鮑魚撈麵，是米芝蓮三星名店唐閣的得意之作。
鮮鮑乾鮑兩相宜
還有更名貴的品種，會製作乾鮑。如體形較大的網鮑，俄羅斯、南非等地都有出產。日本岩手縣三陸町的吉濱出產的鮑魚，就是我們耳熟能詳的吉品鮑。還有日本青森縣的大間崎產的禾麻鮑，肉質柔軟，最適合用來製成乾鮑。乾鮑，是鮑魚中的極品，但製作繁複，講究經驗。曬製鮑魚的師傅先將新鮮鮑魚連殼用水煮熟或蒸熟，才開殼取肉曬製，行內稱為「熟曬」。期間要經過多次曬乾的程序，將之曬成中心部分呈不凝結的半液體狀態的溏心，煨炆過後，鮑魚幽香沉厚，質地柔軟帶有韌度，溏心黏黏軟軟，啜刀黏牙，方為上品。中國人，吃了鮑魚還未夠，連鮑魚殼都唔放過，洗淨後曬乾，即可入藥，稱為石明決，可以清肝明目，舒緩頭痛暈眩。
罐頭鮑魚，可以用來炆一品鍋，喜氣洋洋。
古人好多係粉絲
咁名貴，難怪鮑魚稱譽甚多：海珍品、軟黃金、餐桌黃金、海珍之冠……多到鮑魚自己都唔記得。不單現代人鍾意食，連古代都有fans。漢朝王莽就鍾意食鰒魚。《漢書·王莽傳》記載：「王莽事將敗，悉不下飯，唯飲酒，啖鰒魚。」，原來佢唔開心係食鮑魚解悶。三國曹操都係同好，曹操死後，曹植曾向徐州刺史臧霸要二百隻來祭祀佢，《全上古三代秦漢三國六朝文》卷一五《請祭先王表》就曾記載：「先主喜食鰒魚，前已表徐州臧霸送鰒魚二百。」足見佢生前係幾咁鍾意食鮑魚。至於好多人，都會認為秦始皇都係鮑魚愛好者。因為《史記》載秦始皇去世時，丞相李斯秘不發喪，利用一石鮑魚以亂其臭。不過呢個傳聞係錯嘅。因為呢度嘅鮑魚係指鹹魚或醃魚，正是「如入鮑魚之肆，久而不聞其臭」一樣，指鹹魚嗰陣味，不單勁到可以掩蓋屍臭，聞得多直情連嗅覺都失靈。以後記得，唔好搞錯，鮑魚咁香，聞幾多食幾多都冇問題啦。
