飲食｜烏冬原名係餛飩？讚岐和稻庭烏冬有咩分別？
日本人愛吃麵。烏冬、拉麵、素麵、蕎麥麵，被稱為四大國麵。其中烏冬，更是日本人國麵票選中，名列前茅排第一，堪稱國麵中的大哥大。不論是香川縣的讚岐烏冬，抑或秋田縣的稻庭烏冬，都各有擁躉。食咗咁多年烏冬，咁你又企邊一邊？
烏冬係日本人票選第一位國麵，地位超然。
讚岐稻庭兩大派
烏冬派別多，最大兩派，當數讚岐同稻庭，其實食咗咁多年，你知唔知道兩者有乜嘢唔同？今日不如補補課先。先講產地，讚岐烏冬係由香川縣出產，稻庭烏冬則來自秋田縣，一個喺四國瀨戶內海旁邊，一個喺本州東北地帶，相差十萬八千里。再講形狀，睇真啲，讚岐烏冬麵條呈正方形，而稻庭烏冬麵條呈扁長形，兩種完全唔一樣。跟住到口感，讚岐烏冬粗壯結實，煙韌彈牙，十足濃眉漢子。稻庭烏冬則比較軟滑，清爽細膩，似個小家碧玉。最後論出身，讚岐烏冬喺古時係屬於平民美食，極受大眾歡迎。而稻庭烏冬古時係供應俾貴族同天皇食嘅，平民百姓好少機會食到。至於歷史，稻庭烏冬據說有近三百多年歷史，始於江戶時代，以秋田縣湯沢市稻庭町嘅佐藤吉左衞門家為正宗，流傳至第七代佐藤養助，成為當地頂級烏冬名牌。至於讚岐烏冬，歷史比稻庭更悠久，有傳早喺唐代已由中國傳入，關鍵人物，正是下面呢一個和尚。
香川縣人認為，烏冬係由弘法大師空海傳入日本。
弘法大師傳日本
傳聞將烏冬傳入日本國土嘅，係弘法大師空海。空海係何許人？你咁問，就真係少年你太年輕了。空海法師，俗名佐伯真魚，香川讚岐人，生於公元774年，卒於835年。公元804年，隨日本遣唐使入唐學法，係唐代日本留學僧人，師承今西安青龍寺惠果門下，受獲傳承付法第一人，賜受法號遍照金剛，諡號弘法大師。佢喺唐朝學法後，攜回大量佛教經典返日本，喺梵文字母拼寫原理啟發下，發明咗日本字母平假名，創造咗日本文字。之後創立真言宗，成為開山祖師，喺日本佛界享有崇高聲譽。被譽為日本平安時代最偉大佛法大師。據傳，佢喺唐朝除咗帶回佛經，仲帶咗烏冬製法返讚岐。據說當時瀨戶內海一帶雨水稀少，讚岐人種唔到稻米，就快要餓死，空海就將喺中土學到嘅一種以小麥磨成麵粉再製成嘅麵條，教當地人製造作為糧食，拯救咗讚岐當地嘅貧民。呢種麵食，一般認為，就係現在讚岐烏冬嘅原型。
好難想像，烏冬前身係餛飩。
烏冬原來係餛飩
不過呢種講法，只係烏冬起源嘅其中一種講法。仲有一種，話說奈良時代，日本流行唐果子，即係唐朝傳入嚟嘅糕點。當中以索餅、餺飥同餛飩三種最受歡迎。其中餛飩，原名混沌，係指一種用麵粉包住肉餡，或煮或蒸嘅食物，極似今日嘅餃子或雲吞。據十八世紀江戶時代幕臣伊勢貞丈喺著作《貞丈雜記》中記述：「餛飩又云温飩，用小麥粉作如糰子也，中裹餡兒，煮物也。雲混沌者，言團團翻轉而無邊無端之謂也。因圓形無端之故，以混沌之詞名也。因是食物，故改三水旁為食字旁。因熱煮而食，故加温字而云饂飩也……今世雲饂飩者，切面也，非古之餛飩。」從文字記錄中可以睇到，餛飩最初傳入日本係有饀嘅，但後來慢慢演變，變成冇饀嘅切麵。呢種麵，由於蛻變自餛飩，而饂飩，日文就係うどん（udon），即係今日我哋叫嘅烏冬。所以有理由相信，今日我哋熟悉嘅烏冬，前身就係唐朝傳入嘅餛飩。嘩！咁複雜嘅？睇到混混沌沌係咪？咁不如唔好睇住，食番碗烏冬，慢慢消化下啦。不過，你想食讚岐定稻庭？
